اسلام آباد (نیوز ڈیسک) پاکستان چیمپئنز کی ورلڈ چیمپئن شپ آف لیجنڈز کے تیسرے سیزن میں شرکت کا معاملہ، پی سی بی نے این او سی جاری نہ کرنے کا فیصلہ برقرار رکھا۔

ذرائع کے مطابق پاکستان کرکٹ بورڈ نے گزشتہ سال اختیار کیے گئے مؤقف کو برقرار رکھتے ہوئے پاکستان چیمپئنز کو رواں سیزن میں WCL میں شرکت کے لیے این او سی دینے سے انکار کردیا ہے۔ذرائع کا کہنا ہے کہ بورڈ کی جانب سے ٹیم کو این او سی جاری نہ کرنے کے فیصلے سے تقریباً ایک ہفتہ قبل ہی آگاہ کردیا گیا تھا۔ این او سی نہ ملنے کے باعث پاکستان چیمپئنز ایونٹ میں شرکت نہیں کرسکے گی۔ذرائع کے مطابق پاکستان چیمپئنز کا آج بنگلہ دیش کے خلاف ہونے والا میچ بھی نہیں ہوگا۔

ٹیم کے تمام کھلاڑی اس وقت دبئی میں موجود ہیں، تاہم پی سی بی کی اجازت نہ ہونے کی وجہ سے وہ مقابلے میں حصہ لینے کی پوزیشن میں نہیں ہیں۔ذرائع نے بتایا کہ گزشتہ سیزن میں بھارتی ٹیم نے پاکستان چیمپئنز کے خلاف میچ کھیلنے سے انکار کردیا تھا، جس کے بعد پی سی بی نے WCL کے تیسرے سیزن کے لیے پاکستانی ٹیم کو این او سی جاری نہ کرنے کا فیصلہ کیا۔پاکستان چیمپئنز کے ایونٹ سے باہر ہونے کے باعث WCL میں پاکستان کی نمائندگی نہیں ہوگی، جبکہ اس پیش رفت نے کرکٹ شائقین کی توجہ بھی حاصل کرلی ہے۔