کراچی(نیوزڈیسک) پاکستان ٹی ٹوئنٹی کرکٹ ٹیم کے کپتان شاہد آفریدی نے اسپاٹ فکسنگ میں سزایافتہ فاسٹ باؤلر محمد عامر کی قومی ٹیم میں واپسی پر خوشی کا اظہار کرتے ہوئے کہا ہے کہ انھوں نے اپنی غلطی کا اعتراف سب سے پہلے میرے پاس کیا تھا۔دورہ نیوزی لینڈ کے لیے قومی ٹیم کے اعلان کے بعد اپنے ٹوئٹر پیغام میں شاہد آفریدی کا کہنا تھا کہ عامر کی ٹیم میں واپسی پر خوشی ہے، انھوں نے انگلینڈ میں سب سے پہلے مجھے سچ بتایا، انھوں نے اپنی غلطی تسلیم کی لہٰذا ہمیں ان کی حمایت کرنی چاہیے۔ٹیم کے انتخاب کے حوالے سے آفریدی کا کہنا ہے کہ نیوزی لینڈ کے دورے کے لیے ہم نے بہترین کھلاڑیوں کا انتخاب کیا ہے، یہ ٹیم پاکستان میں دستیاب بہترین کھلاڑیوں پر مشتمل ہے، نئے کھلاڑیوں کو موقع دیا گیا لیکن بدقسمتی سے وہ جگہ نہیں بنا سکے۔عامر کے حوالے سے آفریدی نے مزید کہا کہ انھوں ٹیم کا ساتھ دیا، دوسروں کی طرح ٹی وی پروگراموں میں جا کر ٹیم پر بے جا تنقید نہیں کی۔ٹی ٹوئنٹی کپتان کا کہنا ہے کہ میں حفیظ اور اظہر علی کے موقف کا احترام کرتا ہوں کیونکہ ہمیں اسپاٹ فکسنگ کی وجہ سے مشکلات کا سامنا کرنا پڑا اور ہمارا نام ہر جگہ خراب ہوا تاہم عامر نے عدالت اور پاکستانی عوام دونوں کے سامنے سچ بولا جبکہ دیگر کھلاڑی دو تین سال تک جھوٹ بولتے رہے۔شاہد آفریدی نے کہا کہ اب ہمیں آگے بڑھنے کی ضرورت ہے اور میں عامر کی حمایت کروں گا، امید ہے کہ وہ پوری دیانت داری اور جذبے کے ساتھ پاکستان کرکٹ کی خدمت کریں گے۔
قومی ٹیم کے ہیڈ کوچ وقار یونس نے گزشتہ روز اپنے ایک انٹرویو میں عامر کی ٹیم میں واپسی پر خوشی کا اظہار کیا تھا.محمد عامر کو دورہ نیوزی لینڈ کے لیے ون ڈے اور ٹی ٹوئنٹی ٹیم میں ویزے کی شرط پر ٹیم میں شامل کیا گیا ہے.