اسلا م آباد (نیوز ڈ یسک)عالمی اور مقامی مارکیٹوں میں سونے کی قیمتوں میں کمی کا سلسلہ بدستور جاری ہے۔
تازہ کاروباری دن کے دوران بھی سونے کی قدر میں نمایاں کمی دیکھی گئی، جس کے نتیجے میں چند روز کے اندر فی تولہ سونا مجموعی طور پر تقریباً 38 ہزار روپے تک سستا ہو چکا ہے۔ماہرین کے مطابق بین الاقوامی مارکیٹ میں سونے کے ذخائر کی فروخت میں اضافے اور طلب میں کمی کے باعث قیمتی دھاتوں کی قیمتوں پر دباؤ برقرار ہے۔ اسی رجحان کے اثرات پاکستان کی مقامی صرافہ مارکیٹوں میں بھی نمایاں طور پر دیکھے جا رہے ہیں۔عالمی بلین مارکیٹ میں فی اونس سونے کی قیمت 97 ڈالر 20 سینٹ مزید کم ہو کر 4 ہزار 102 ڈالر تک پہنچ گئی۔ اس کمی کے بعد مقامی مارکیٹ میں 24 قیراط فی تولہ سونے کی قیمت میں 9 ہزار 720 روپے کی بڑی گراوٹ ریکارڈ کی گئی، جس کے بعد نئی قیمت 4 لاکھ 32 ہزار 716 روپے ہو گئی۔اسی طرح دس گرام سونے کی قیمت میں بھی 8 ہزار 748 روپے کی کمی ہوئی، جس کے نتیجے میں اس کی قیمت 3 لاکھ 69 ہزار 422 روپے تک آ گئی۔
چاندی کی قیمتیں بھی کمی کے رجحان سے محفوظ نہ رہ سکیں۔ عالمی مارکیٹ میں فی اونس چاندی 40 سینٹ سستی ہو کر 64 ڈالر 10 سینٹ پر آ گئی، جبکہ پاکستان میں فی تولہ چاندی کی قیمت 40 روپے کم ہو کر 6 ہزار 889 روپے رہ گئی۔ دس گرام چاندی کی قیمت بھی 36 روپے کمی کے بعد 5 ہزار 857 روپے پر پہنچ گئی۔یاد رہے کہ گزشتہ چند دنوں سے سونے کی قیمتوں میں مسلسل کمی دیکھنے میں آ رہی ہے۔ 6 جون کو فی تولہ سونا 12 ہزار 489 روپے سستا ہوا تھا، جبکہ 8 جون کو مزید 3 ہزار 94 روپے کی کمی ریکارڈ کی گئی۔ اس کے بعد 10 جون کو بھی قیمت میں 12 ہزار 627 روپے کی بڑی گراوٹ سامنے آئی، اور اب تازہ کمی نے مجموعی کمی کو تقریباً 38 ہزار روپے فی تولہ تک پہنچا دیا ہے۔
