اسلام آباد (نیوز ڈیسک)عالمی اور ملکی صرافہ بازاروں میں سونے اور چاندی کی قیمتوں میں نمایاں کمی کا رجحان برقرار ہے،

جہاں چند روز کے وقفے کے بعد آج ایک بار پھر قیمتی دھاتوں کی قیمتوں میں بڑی گراوٹ ریکارڈ کی گئی۔بین الاقوامی مارکیٹ میں فی اونس سونے کی قیمت 126 ڈالر 27 سینٹ کم ہو کر 4 ہزار 200 ڈالر تک آ گئی، جس کے اثرات مقامی مارکیٹ پر بھی واضح طور پر دیکھنے میں آئے۔ملک بھر کے صرافہ بازاروں میں 24 قیراط سونے کی فی تولہ قیمت 12 ہزار 627 روپے کم ہونے کے بعد 4 لاکھ 42 ہزار 436 روپے رہ گئی۔ اسی طرح 10 گرام سونے کی قیمت میں 11 ہزار 364 روپے کی کمی ریکارڈ کی گئی، جس کے بعد نئی قیمت 3 لاکھ 78 ہزار 170 روپے ہو گئی۔چاندی کی قیمتیں بھی نیچے آ گئیں۔ فی تولہ چاندی 385 روپے سستی ہونے کے بعد 6 ہزار 929 روپے پر پہنچ گئی، جبکہ 10 گرام چاندی کی قیمت 352 روپے کم ہو کر 5 ہزار 893 روپے رہ گئی۔

یاد رہے کہ گزشتہ ہفتے بھی سونے کی قیمتوں میں نمایاں کمی دیکھی گئی تھی۔ 6 جون کو عالمی مارکیٹ میں فی اونس سونا 124 ڈالر سستا ہوا تھا، جبکہ مقامی مارکیٹ میں فی تولہ قیمت میں 12 ہزار 489 روپے کی کمی آئی تھی۔ اس کے بعد پیر کے روز بھی عالمی اور مقامی دونوں مارکیٹوں میں سونے کی قیمتوں میں مزید کمی ریکارڈ کی گئی تھی۔