دبئی(نیوز ڈیسک) ایک اور بڑا اعزاز پاکستانی امپائر علیم ڈار کی جھولی میں گرنے کو تیار ہے، وہ ہفتے کو ٹیسٹ میچز کی سنچری مکمل کرنے والے دنیا کے تیسرے امپائر بن جائیں گے۔ ان کا کہنا ہے کہ اتنی محبت اور سپورٹ نہ ملتی تو یہاں تک پہنچنا ممکن نہ تھا۔ تفصیلات کے مطابق علیم ڈار جب ہفتے سے جنوبی افریقہ اور انگلینڈ کے درمیان شروع ہونے والے دوسرے ٹیسٹ کیلیے میدان میں اتریں گے تو بطور امپائر 100 میچ مکمل ہوجائیں گے۔ وہ سٹیو بکنر اور روڈی کوئٹزن کے بعد اس سنگ میل پر پہنچنے والے دنیا کے تیسرے امپائر ہوں گے۔ 47 سالہ سابق رائٹ ہینڈ بیٹسمین اور آف سپنر علیم نے اپنے 12 سالہ پلیئنگ کیریئر میں 17 فرسٹ کلاس میچز کھیلے۔ کھیل سے ریٹائرمنٹ کے بعد انھوں نے بطور امپائر کیریئر کی دوسری اننگز کا آغاز کیا۔ وہ پہلی مرتبہ پاکستان اور سری لنکا کے درمیان گوجرانوالہ میں 2000 میں کھیلے گئے ون ڈے میں بطور امپائر کھڑے ہوئے۔ تب سے اب تک وہ 99 ٹیسٹ، 178 ون ڈے اور35 ٹوئنٹی 20 میچز میں خدمات انجام دے چکے ہیں۔ علیم کو2004 میں آئی سی سی امپائر الیٹ پینل میں منتخب کیا گیا، جلد ہی وہ دنیا کے معتبر اور قابل احترام امپائر بن گئے۔ انھوں نے 2009، 2010 اور 2011 میں دنیا کے بہترین امپائر کا ایوارڈ بھی اپنے نام کیا، 2011 میں ہی علیم کو پاکستان کا سب سے بڑا سویلین ایوارڈ ’پرائڈ آف پرفارمنس‘ دیا گیا، 2013 میں انھیں ستارہ امتیاز سے بھی نوازا گیا۔ واضح رہے کہ سٹیو بکنر نے سب سے زیادہ128 اور روڈی کوئٹزن نے 108 ٹیسٹ میں امپائرنگ کا فریضہ انجام دیا، دونوں ہی ریٹائر ہوچکے ہیں۔