اسلام آباد (نیوز ڈیسک) ایران کی جانب سے قطر میں امریکی فوجی اڈے کو نشانہ بنائے جانے کے بعد بین الاقوامی مارکیٹ میں خام تیل کی قیمتوں میں واضح گراوٹ دیکھنے میں آئی ہے۔ اطلاعات کے مطابق امریکی خام تیل (ڈبلیو ٹی آئی) کی قیمت میں 3 ڈالر 32 سینٹ فی بیرل کمی واقع ہوئی، جس کے بعد اس کی نئی قیمت 69.17 ڈالر فی بیرل ہو گئی۔ دوسری جانب، برطانوی برینٹ آئل کی قیمت میں بھی 6 ڈالر 28 سینٹ کی نمایاں کمی ہوئی اور یہ 72.17 ڈالر فی بیرل پر آ گیا۔

ذرائع کے مطابق ایران نے حالیہ کشیدگی کے تناظر میں قطر اور عراق میں امریکی فوجی تنصیبات کو بیلسٹک میزائلوں سے نشانہ بنایا۔ امریکی میڈیا رپورٹس میں بتایا گیا ہے کہ ایران نے قطر کی سمت چھ بیلسٹک میزائل داغے۔

قطر کی وزارت خارجہ نے اس صورتحال پر ردعمل دیتے ہوئے وضاحت کی ہے کہ حملے سے قبل حفاظتی تدابیر کے طور پر امریکا کا العدید فوجی اڈہ خالی کروا لیا گیا تھا۔ قطر کا یہ بھی کہنا ہے کہ اس کے فضائی دفاعی نظام نے ایک میزائل کو کامیابی سے تباہ کر دیا۔

قطری حکام نے ایرانی حملے کی شدید مذمت کرتے ہوئے کہا ہے کہ ان کا ملک اس جارحیت کا جواب دینے کا حق محفوظ رکھتا ہے۔ بیان میں مزید وضاحت کی گئی ہے کہ حملے میں کوئی جانی نقصان نہیں ہوا۔

یاد رہے کہ العدید ایئربیس قطر میں واقع امریکا کا مشرق وسطیٰ میں سب سے بڑا فوجی اڈہ تصور کیا جاتا ہے، جہاں طویل عرصے سے امریکی افواج تعینات ہیں۔