اسلام آباد(نیوز ڈیسک)مشرقِ وسطیٰ میں جاری کشیدہ حالات کے پیش نظر وفاقی حکومت نے تمام آئل کمپنیوں کو تیل کے ذخائر یقینی بنانے کی ہدایت جاری کر دی ہے۔ اس فیصلے کا مقصد ممکنہ بحران سے بچاؤ اور ایندھن کی بلاتعطل فراہمی کو یقینی بنانا ہے۔ذرائع کے مطابق حکومت نے فوری طور پر 14 کروڑ لیٹر پیٹرول درآمد کرنے کا حکم دیا ہے۔ اس ضمن میں آئل اینڈ گیس ریگولیٹری اتھارٹی (اوگرا) نے آئل مارکیٹنگ کمپنیوں کو ایک خط کے ذریعے کم از کم 20 دن کا تیل ذخیرہ رکھنے کی تاکید کی ہے۔

اوگرا نے واضح کیا ہے کہ خطے میں پیدا ہونے والی صورتحال کے باعث کمپنیوں کو تیل کی فراہمی میں ممکنہ رکاوٹوں کے پیش نظر پیشگی اقدامات کرنے کی ضرورت ہے۔پاکستان اسٹیٹ آئل (پی ایس او) نے حکومتی ہدایات پر فوری عمل کرتے ہوئے تقریباً 7 کروڑ لیٹر پیٹرول کی خریداری کے لیے ہنگامی بنیادوں پر ٹینڈر جاری کر دیا ہے۔ پی ایس او حکام کے مطابق یہ تیل بردار جہاز معمول کے شیڈول سے پہلے، یعنی 6 جولائی کی بجائے 26 جون کو کراچی بندرگاہ پر لنگر انداز ہوگا۔حکام کا کہنا ہے کہ یکم جولائی تک ملک میں 14 کروڑ لیٹر اضافی پیٹرول دستیاب ہوگا۔ اگر صورتحال مزید بگڑتی ہے تو اضافی ہنگامی ٹینڈرز بھی جاری کیے جا سکتے ہیں۔