ممبئی(نیوز ڈیسک)بولی ووڈ انڈسٹری کے میگا سٹار امیتابھ بچن کی نواسی نیویا نویلی نندا28نومبر کو پیرس میں منعقد کیے جانے والے ڈبیوٹنٹ لے بال فیشن ایونٹ میں حصہ لے رہی ہیں۔ واضح رہے مذکورہ فیشن ایونٹ میں دنیا بھر سے ہر سال 18سے 22سال کی25لڑکیاں حصہ لیتی ہیں۔نیویا شویتا بچن اور نکھل نندا کی صاحبزادی جبکہ معروف اداکار راج کپور کی پوتی ہیں۔اے ایف پی نیوز ایجنسی کی طرف سے یو ٹیوب پر پوسٹ کی جانے والی ویڈیو میں نیویا کا کہنا ہے کہ وہ پہلی مرتبہ اس نوعیت کی تقریب میں حصہ لے رہی ہیں اس لئے خاصی پریشان ہیں۔ انکا مزید کہنا ہے کہ اگرچہ وہ نروس ہیں تاہم وہ بے حد خوش بھی ہیں۔انھوں نے بتایا کہ و ہ آجکل باقاعدہ رقص کی تربیت کے ساتھ ساتھ کپڑے پہننے کے سلیقے بھی سیکھ رہی ہیں۔ علاوہ ازیں انکا کہنا ہے کہ وہ ہر روز اپنے کمرے میں لمبی ہیل والے جوتے پہن کر چلنے کی بھی مشق کرتی تاکہ تقریب کے دوران انھیں کوئی دشواری پیش نہ آئے۔زرائع کے مطابق فیشن ایونٹ میں حصہ لینے والی تمام لڑکیوں کو ٹاپ ڈیزائنرز کپڑے ڈیزائن کر کے دیں گے۔جبکہ نیویا ڈیور کا ڈیزائن کردہ لباس زیب تن کریں گی۔نیویا اپنے خاندان سمیت اس ایونٹ کیلئے بے حد پر جوش ہیں۔