مکوآنہ (این این آئی)وفاقی وزیر داخلہ رانا ثناء اللہ کے ڈیرے کے قریب خونی ڈاکہ‘ ڈاکوئوں کے مسلح گروہ نے لوٹ مار کے دوران مزاحمت کرنے پر کریانہ سٹور کے مالک کو گولیاں مار کر قتل کر کے باآسانی فرار ہو گئے، علاقہ میں خوف وہراس پھیل گیا، پولیس نے نعش تحویل میں لیکر پوسٹ مارٹم کیلئے ہسپتال منتقل کر کے قاتل ڈاکوئوں کی تلاش شروع کر دی۔

بتایا جاتا ہے کہ وفاقی وزیر داخلہ کے گھر کے قریب نثار کالونی گلی نمبر11 میں رضوان ولد اشرف نے رمضان کریانہ سٹور کے نام سے دکان بنا رکھی ہے، 6 بجے کے لگ بھگ موٹرسائیکل سوار ڈاکو گاہک بن کر دکان پر آئے اور آتے ہی اسلحہ نکال کر سب کچھ حوالے کرنے کو کہا اور رقم چھیننے لگے تو رضوان نے مزاحمت کی تو اتھرے ڈاکوئوں نے فائرنگ کر دی، گولیاں لگنے سے دکاندار بری طرح لہولہان ہو کر گر پڑا تو ڈاکو ہوائی فائرنگ کرتے ہوئے موقع سے فرار ہو گئے، واقعہ کی اطلاع ملتے ہی پولیس کی بھاری نفری موقع پر پہنچ گئی اور زخمی تاجر کو تشویشناک حالت میں ہسپتال لایا گیا جہاں وہ زخموں کی تاب نہ لاتے ہوئے دم توڑ گیا‘ مذکورہ دکاندار رضوان تین بچوں کا باپ بتایا جاتا ہے۔خونی ڈاکے کے بعد علاقہ میں خوف وہراس پھیل گیا۔ یاد رہے کہ چند روز قبل بھی وفاقی وزیر داخلہ کے ڈیرہ کے قریب ڈاکوئوں نے شہری سے ساڑھے چودہ لاکھ کی رقم چھین کر گولی مار دی تھی اور کچھ عرصہ قبل سمن آباد ریڈیکس روڈ پر موبائل شاپ مالک کو قتل کر دیا گیا تھا۔ تاہم پولیس نے گزشتہ روز خونی ڈکیتی میں مارے جانیوالے تاجر رضوان کی نعش کو پوسٹ مارٹم کیلئے ہسپتال منتقل کر کے قاتل ڈاکوئوں کی تلاش شروع کر دی ہے۔