اسلام آباد (نیوز ڈیسک) پاکستانی کرکٹر عمر اکمل ورلڈکپ میں اپنی خراب پرفارمنس کے بعد سے اب تک قومی ٹیم کا حصہ نہیں بنے اور صرف ٹی 20 ٹیم میں ہی نمائندگی حاصل کرنے میں کامیاب ہو سکے ہیں تاہم اب شائد وہ بھی اپنی پرفارمنس سے خاصے مایوس ہیں کیونکہ اب وہ کرکٹ کے بجائے اداکاری پر توجہ دینے لگے ہیں جس کی ابتداءانہوں نے مشہور ویب سائٹ ”ڈب سمیش“ پر ایک ویڈیو کلپ جاری کر کے کر دی ہے۔
تفصیلات کے مطابق بہت سے دیگر اداکاروں اور کرکٹرز کی طرح عمر اکمل نے بھی اپنی ایک ویڈیو ”ڈب سمیش“ ویب سائٹ پر اپ لوڈ کی ہے جس میں وہ حالیہ بھارتی فلم ”بجرنگی بھائی جان“ کے ایک ڈائیلاگ پر اداکاری کرتے دکھائی دے رہے ہیں۔ اس ویڈیو میں ان کے ساتھ ایک اور شخص (جو شائد ان کا بھائی یا کزن ہے) اور ایک کم سن بچی بھی نظر آ رہی ہے۔ اس ویڈیو میں عمر اکمل نے اداکاری میں جوہر دکھانے کی ایک کوشش تو ضرور کی ہے تاہم آپ تو جانتے ہی ہیں کہ کوئی بھی کام کرنے میں ابتدائی طور پر مشکلات کا سامنا تو کرنا ہی پڑتا ہے اس لئے امید کی جا سکتی ہے کہ اگر عمر اکمل نے کرکٹ کی طرح اس ”فیلڈ“ میں بھی ”محنت“ جاری رکھی تو جلد ہی کامیابی کی جانب گامزن بھی ہو جائیں گے۔