لاہور( این این آئی)ملت پارک کے علاقہ اسلام آباد کالونی میں واقع ایک گھر سے دو بھائیوں کی لاشیں ملی ہیں۔پولیس کے مطابق 5 سالہ ارتضی اور 3 سالہ راحیل کی لاشیں آٹے رکھنے والی لوہے کی پیٹی سے برآمد ہوئی ہیں۔پولیس کا کہنا ہے کہ ایک روز قبل دونوں بھائیوں کے اغوا ء کا مقدمہ درج کرایا گیا تھا

اغوا کی ایف آئی آر بچوں کے والد کی مدعیت میں درج کی گئی تھی۔ایف آئی آر کے متن کے مطابق بچے کھیل رہے تھے کہ انہیں اغوا ء کر لیا گیا۔پولیس نے بتایا ہے کہ مکان کے ایک پورشن میں مقتول بچوں کے چچا کی فیملی مقیم ہے۔پولیس کا یہ بھی کہنا ہے کہ مختلف پہلوئوں سے واقعے کی تحقیقات کر رہے ہیں۔بچوں کے والد کی جانب سے پولیس کو دئیے گئے بیان میں کہا گیا ہے کہ بچے گھر میں ہی کھیلتے ہوئے لاپتہ ہوئے تھے۔یہ بھی شبہ ظاہر کیا جارہا ہے کہ بچے کھیلتے ہوئے آٹے کی پیٹی میں چھپے گئے اور اوپر سے ڈھکن بند ہونے کی وجہ سے دم گھٹنے سے ان کا انتقال ہو گیا۔پولیس نے بتایا ہے کہ بچوں کے والد کا کہنا ہے کہ ہم لوگ سمجھتے رہے کہ بچوں کو کسی نے اغوا ء کر لیا ہے، بدبو آنے پر آٹے کی پیٹی کھولا تو دونوں کی لاشیں ملیں۔پولیس کے مطابق دونوں بچوں کی لاشوں کے پوسٹمارٹم کے بعد اصل حقائق سامنے آئیں گے۔