پنڈی بھٹیاں، فیصل آباد(این این آئی) سابق ممبر صوبائی اسمبلی اور چیئرمین بیت المال پنجاب احسن عنصر بھٹی نے بھی پاکستان تحریک انصاف کو خیر باد کہہ دیا۔میڈیا سے گفتگو کرتے ہوئے پی ٹی آئی رہنما احسن عنصر بھٹی نے کہا کہ ابھی کسی پارٹی میں شامل نہیں ہو رہا، اداروں کے خلاف مہم میں پی ٹی آئی کا ساتھ نہیں دے سکتا، فوج ہماری سرحدوں کی نگہبان ہے جس سے ٹکراؤ ملک دشمنی ہے۔
خیال رہے کہ احسن عنصر بھٹی پی پی 71 سے پاکستان تحریک انصاف کے سابق ایم پی اے تھے، وہ بطور چیئرمین بیت المال پنجاب بھی خدمات انجام دے چکے ہیں۔ پاکستان تحریک انصاف کے سابق ممبر قومی اسمبلی شیخ خرم شہزاد نے پارٹی سے باقاعدہ علیحدگی کا اعلان کر دیا۔پریس کانفرنس کرتے ہوئے سابق پی ٹی آئی ایم این اے شیخ خرم شہزاد نے کہا کہ 11 سال پہلے سیاست شروع کی، 2013ء میں ایم پی اے اور 2018ء میں ممبر قومی اسمبلی بنا، 9 مئی کو جو کچھ ہوا، بہت افسوسناک ہے،
شیخ خرم شہزاد پارٹی سے علیحدگی کا اعلان کرتے ہوئے آبدیدہ ہوگئے۔انہوں نے کہا کہ ڈپٹی سیکرٹری جنرل ورکرز کا عہدہ چھوڑنے کا بھی اعلان کرتا ہوں، پارٹی چھوڑنے کیلئے مجھ پر کوئی دباؤ نہیں، آئندہ کی سیاست کا فیصلہ دوستوں سے مشاورت کے بعد کروں گا، پاک فوج کے شہدا کو خراج تحسین پیش کرتا ہوں، میرا جینا مرنا پاکستان میں ہے، ملک سے باہر نہیں جا رہا۔
