لاہور (مانیٹرنگ، این این آئی) قومی کرکٹ ٹیم کے سابق کپتان شاہد آفریدی نے کیویز کے خلاف سیریز کے چوتھے میچ میں بھی کامیابی اور ون ڈے کی نمبر ون ٹیم بننے پر ہوم ٹیم کو مبارکباد دی ہے۔سماجی رابطے کی ویب سائٹ ٹوئٹر پر اپنے پیغام میں شاہد آفریدی نے کہا کہ کہا کہ 102رنز سے کامیابی اور ون ڈے کی نمبر ون ٹیم بننا شاندار ہے، ویلڈن پلیئرز۔
انہوں نے کپتان بابر اعظم کے ون ڈے میں 5 ہزار رنز مکمل ہونے اور میچ میں سنچری بنانے پر مبارک باد بھی دی۔شاہد آفریدی نے چوتھے ون ڈے میں اسامہ میر اور وسیم جونیئر کی بولنگ کی بھی تعریف کی۔انہوں نے لکھا کہ لڑکوں پوری قوم کو بہت فخر ہے، آپ نے آنے والے ورلڈ کپ میں ہماری امیدیں بڑھا دی ہیں۔واضح رہے کہ پاکستان اور نیوزی لینڈ کے درمیان پانچ میچز پر مشتمل ون ڈے سیریز کے آغاز سے قبل پاکستان کی رینکنگ پانچویں تھی۔
پاکستان نے نیوزی لینڈ کے خلاف سیریز کے اب تک کھیلے گئے چاروں میچز جیت کر آئی سی سی ون ڈے رینکنگ میں پہلی پوزیشن حاصل کی ہے۔ میڈیا سے بات چیت کرتے ہوئے شاہد آفریدی کا کہنا تھا کہ میں کہتا ہوں کہ اپنے آپ کو اتنا مضبوط کریں کے کسی کو آنکھیں دکھا سکیں، شاہد آفریدی نے کہا کہ میرا خیال ہے کہ کہ ایشیا کپ مختلف ٹورنامنٹ ہے جبکہ عالمی کب آئی سی سی کا ایونٹ ہے۔ عالمی کپ میں شرکت سے منع کرنا مشکل ہو جائے گا۔ اس لیے پاکستان کو عالمی کپ کھیلنے کے لیے بھارت جانا چاہئے۔
