نئی دہلی(این این آئی)نوبیل انعام یافتہ بھارتی ماہر اقتصادیات امرتیا سین کو آبائی گھر خالی کرنے کا نوٹس مل گیا۔ برطانوی میڈیا کی رپورٹ کے مطابق مغربی بنگال کی یونیورسٹی نے امرتیا سین کو کیمپس میں ان کا آبائی مکان خالی کرنے کو کہا ہے۔

برطانوی میڈیا کے مطابق پروفیسر امرتیا سین کو مکان خالی کرنے کیلئے 5 مئی تک کا وقت دیا گیا ہے۔ یونیورسٹی حکام کے مطابق پروفیسر امرتیا سین نے کیمپس کے مکان پر ناجائز قبضہ کر رکھا ہے۔ پروفیسر امرتیا سین کا اس حوالے سے کہنا تھا کہ زمین میرے نام ہے، مکان 1943 سے میری فیملی کے پاس ہے۔ برطانوی کے مطابق وزیراعلی مغربی بنگال ممتا بینر جی نے یونیورسٹی انتظامیہ کے حکم کی مذمت کی ہے۔ امرتیا سین سے مکان جبرا خالی کرانے پر ممتابینرجی نے دھرنے کی دھمکی دی ہے۔ ترنمول کانگریس کے رہنما تنموئیگھوش نے کہا کہ یونیورسٹی کے وائس چانسلر بی جے پی نظریہ یونیورسٹی پر مسلط کرنا چاہتے ہیں۔ انہوں نے کہا کہ امرتیا سین بی جے پی کی پالیسیوں کے ناقد ہیں، اسی لیے انہیں تنگ کیا جا رہا ہے۔