اسلام آباد (این این آئی)سینیٹ میں پاکستان کرکٹ ٹیم کے کپتان بابر اعظم کی انگریزی کا تذکرہ ہوا۔سینیٹ کے اجلاس میں جماعت اسلامی کے سینیٹر مشتاق احمد نے اردو کو بطور قومی زبان قرار دیے جانے سے متعلق تحریک ایوان میں پیش کی۔سینیٹر مشتاق احمدنے کہا کہ بابر اعظم کرکٹ کی دنیا کا برانڈ ہے، شعیب اختر کہتے ہیں کہ بابراعظم انگلش نہیں بول سکتا اس لیے اسٹار نہیں بن سکا۔سینیٹر مشتاق احمد نے کہا کہ پاکستان کے آئین کے مطابق اردو کو سرکاری زبان کا درجہ دیا گیا ہے، سپریم کورٹ نے اردو کو سرکاری زبان قرار دینے کا فیصلہ کیا، اردو کو سرکاری زبان قرار اور تمام دفاتر میں اردو زبان رائج کی جائے، عدلیہ اپنے فیصلے اردو میں صادر کرے۔پیپلز پارٹی کے سینیٹر تاج حیدر نے کہا کہ اردو کو سرکاری زبان رائج کیے جانے سے متعلق مشترکہ کمیٹی بنائی جائے، اردو کو سرکاری زبان رائج کرنا احسن اقدام ہوگا۔