اسلام آباد(نیوز ڈیسک)پیٹرولیم مصنوعات ایک مرتبہ پھر مہنگی کردی گئیں، پیٹرول کی قیمت میں 2 روپے 10 پیسے جبکہ ڈیزل کے نرخ میں 30 پیسے فی لیٹر اضافہ ہوگیا۔

اسلام آباد سے جاری پیٹرولیم ڈویژن کے اعلامیے کے مطابق پیٹرول کی فی لیٹر قیمت میں 2 روپے 10 پیسے کا اضافہ کیا گیا ہے، جس کے بعد نئی قیمت 392 روپے 76 پیسے فی لیٹر مقرر کردی گئی ہے۔اعلامیے میں بتایا گیا ہے کہ ڈیزل بھی 30 پیسے فی لیٹر مہنگا ہوگیا، جس کے نتیجے میں ہائی اسپیڈ ڈیزل کی نئی قیمت 399 روپے 64 پیسے فی لیٹر ہوگئی ہے۔

حکومت کی جانب سے جاری نوٹیفکیشن کے مطابق پیٹرولیم مصنوعات کے نئے نرخ 3، 4 اور 5 اکتوبر کے لیے نافذ العمل ہوں گے۔واضح رہے کہ حکومت نے اس سے ایک روز قبل بھی پیٹرولیم مصنوعات کی قیمتوں میں اضافے کا اعلان کیا تھا۔