لاہور(مانیٹرنگ ڈیسک ٗ پی پی آئی)لاہور پولیس زمان پارک کے علاقے میں واقع عمران خان کے گھر کا گیٹ توڑ کر اندر داخل ہو گئی ہے۔پی ٹی آئی کے مرکزی سیکرٹری جنرل اسد عمر نے ٹویٹ میں کہا کہ عدالتی احکامات کے خلاف زمان پارک میں آپریشن جاری ہے۔ گھر پر صرف ایک نہتی گھریلو خاتون موجود ہے۔

دوسری جانب وزیر اطلاعات مریم اورنگزیب نے کہا ہے کہ جس سیاسی لیڈرز کے پاس عوام کی طاقت ہوتی ہے وہ غنڈوں کا سہارا نہیں لیتے،ایک شخص ملکی مفادات سے کھیلتے ہوئے نہیں ڈررہا اور نوجوانوں سے ریاست پر حملے کرواتا ہے۔لیگی رہنمامریم اورنگزیب نے پریس کانفرنس سے خطاب کرتے ہوئے کہا ہے کہ زمان پارک میں اس وقت دہشت گرد اور کلعدم تنظیموں کے کارکنان موجود ہیں۔ 65 پولیس اہلکاروں کو زخمی کرنے والے کو آسانی سے ضمانت مل جاتی ہے، عمران خان عدالتوں میں مطلوب تھے اور وہ وارنٹ کے باوجود پیش نہیں ہو رہے تھے، متعدد سماعتوں میں عمران خان عدالتوں میں پیش نہیں ہوئے، عمران خان ہر فورم پر اپنی بیماری کا رونا رورہا ہے اور جان کو خطرے کا بہانہ بنارہا ہے۔وزیر اطلاعات نے کہا کہ چور، کرپٹ، جھوٹا اور دہشتگرد کھلے عام گھوم رہا ہے، ایک شخص ڈنڈے، کلاشنکوف، غلیلیں لیکر عدالت جاتا ہے۔ کیا انصاف جتھوں اور دھمکیوں سے ڈر گیا ہے؟ عدالت جانے والا گاڑی پر ڈنڈے اور اسلحہ لہرارہا ہے مگر ریلیف مل رہا ہے اور کوئی پوچھنے والا نہیں، لاڈلے اور غنڈے کو ریلیف کا بنڈل مل رہا ہے، کیا عمران خان قانون اور آئین سے بالاتر ہے؟۔مریم اورنگزیب کا کہنا تھا کہ عمران خان کے جرائم سب کو معلوم ہیں، صدر،اسپیکر اور ڈپٹی اسپیکرسے آئین شکنی کرواتاہے، ایک دہشتگرد کھلے عام گھوم رہا ہے۔ ترازو کے پلڑے برابر کیے جائیں

موضوعات:عمران خان