اسلام آباد(این این آئی)پاکستان میں گزشتہ پانچ سالوں کے دوران 254غیر ملکیوں کو قومی شہریت دی گئی جن میں 159بھارتی بھی شامل ہیں۔نجی ٹی وی کی رپورٹ کے مطابق وزارت داخلہ نے گزشتہ پانچ سالوں میں چار افغان، تین چینی، چار بنگلہ دیشی،

ایک اطالوی، ایک سوئس، تین امریکی، دو کینیڈین اور چار برطانوی افراد کو قومی شہریت دی۔رپورٹ کے مطابق شہریت دینے کی وجوہات میں پاکستان میں شادیاں، خاندانی تعلقات، پیشے اور طویل مدتی رہائش شامل تھی۔اس کے علاوہ برما، فلپائن، مالدووا، کرغزستان، سری لنکا، بنگلہ دیش اور نیپال کے 20سے زائد شہریوں نے بھی اس عرصے میں پاکستانی شہریت حاصل کی ہے۔دستاویزات میں بتایا گیا کہ گزشتہ ماہ دو ہندوستانیوں کو پاکستانی شہریت دی گئی تھی، 2019میں 55، 2018میں 43، 2020اور 2021میں 27، اور پچھلے سال 18کو پاکستانی شہریت دی گئی تھی۔رپورٹ کے مطابق وزارت داخلہ کے پاس اب بھی شہریت کی منظوری کیلئے ہزاروں درخواستیں زیر التوا ہیں۔