اسلام آباد (مانیٹرنگ ڈیسک /این این آئی)ایران نے پاکستان سےکہا ہےکہ وہ ایران پاکستان (آئی پی) گیس لائن منصوبےکا ایک حصہ 2024 تک اپنی سرزمین پر مکمل کرے ورنہ جرمانےکے لیے تیار رہے۔نجی ٹی وی جیو نیوز کے مطابق وزارت توانائی کے
سینیئر عہدے دار کے مطابق تہران حکام نے تین ہفتے قبل دورہ کرنے والے پاکستانی حکام کے وفدکو بھی اس بات سے آگاہ کیا تھا۔ایران کا مطالبہ ہے کہ پاکستان مارچ 2024 تک آئی پی گیس لائن منصوبے کا ایک حصہ اپنی سرزمین پر تعمیر کرے، اگر پاکستان گیس لائن منصوبےکی تعمیر نہ کرسکا تو 18 ارب ڈالر جرمانہ عائدکیا جائےگا۔دوسری جانب گوادر کو 100 میگاواٹ بجلی فراہم کرنے کا منصوبہ تکمیل کے آخری مراحل میں پہنچ گیا۔ذرائع کے مطابق فروری میں گوادر کے لیے 100 میگاواٹ بجلی کے منصوبے کی کمیشننگ ہوگی جس کے لیے گزشتہ دنوں پاکستان اور ایران کے اعلی حکام نے جائزہ بھی لیا۔ذرائع کے مطابق پاک ایران توانائی منصوبے کے تحت رواں سال گوادر کو 100 میگاواٹ بجلی فراہم کردی جائے گی۔اس سے قبل ایران پاکستان کو 104 میگاواٹ بجلی فراہم کررہا ہے۔
