اسلام آباد(این این آئی)وفاقی وزیر داخلہ رانا ثناء اللہ نے کہا ہے کہ پاکستان تحریک انصاف والے خود ہی استعفیٰ دے کر خجل خوار ہورہے ہیں،پوچھتا ہوں پہلے دئیے کیوں تھے؟۔لندن میں میڈیا سے گفتگو میں رانا ثنا اللہ نے کہاکہ پی ٹی آئی والے استعفے دینے کے بعد اب کہتے ہیں قبول نہ کیے جائیں، پوچھتا ہوں پہلے دئیے کیوں تھے؟۔انہوں نے کہا کہ پی ٹی آئی والے جس اسمبلی پر لعنت بھیج کر گئے تھے، اب اسی میں آنا چاہتے ہیں، بڑی شرم کی بات ہے۔وفاقی وزیر داخلہ نے کہا کہ عمران خان پاکستان میں عدم استحکام کی جدوجہد کر رہا ہے، وہ مہم جوئی کر رہا ہے کہ پاکستان ڈی فالٹ کر جائے۔انہوںنے کہاکہ عمران خان چاہتا ہے کہ اس کا اقتدار ہے تو سب ٹھیک ورنہ پاکستان پر ایٹم بم بھی گرنا چاہیے اور اسے تقسیم بھی ہونا چاہیے۔رانا ثناء اللہ نے کہا کہ میں پاکستان مریم نواز کے ساتھ پہنچوں گا، ملک کے عوام عمران خان کو ووٹ کی طاقت سے مائنس کردیں۔انہوں نے کہا کہ مسلم لیگ (ن)پنجاب کے انتخابات میں اکثریت حاصل کرے گی۔