اسلام آباد (مانیٹرنگ ڈیسک/این این آئی)پاکستان مسلم لیگ کے سینئر رہنما و گورنر پنجاب بلیغ الرحمان نے کہا ہے کہ اسمبلی کی تحلیل کی سمری موصول ہو چکی ہے ،کل تک کا وقت ہے۔گورنر پنجاب کا کہنا تھا کہ عوام کی نمائندہ اسمبلی کو وقت سے پہلے تحلیل کرنا مشکل فیصلہ ہے،

90 دن میں الیکشن کرانا ہیں جس میں رمضان بھی ہوگا، ایک نگراں سیٹ اپ بھی بناناہے، سب چیزیں دیکھتے ہوئے فیصلہ کریں گے۔گورنر پنجاب محمد بلیغ الرحمن نے کہا ہے کہ پنجاب کی نمائندہ اسمبلی کو تحلیل کرنے کی ایڈوائس مجھ تک پہنچی ہے، جمہوری فرد کے لیے ایوان کو توڑنا مشکل کام ہے لیکن آئین میں اسمبلی تحلیل کرنے کی شق موجود ہے ۔ ایکسپو سنٹر میں صحافیوں سے گفتگو کرتے ہوئے انہوں نے کہا کہ اس کے قانونی پہلو ئوںکو دیکھنا میرے فریضے میں شامل ہے ،آئینی اور قانونی تمام پہلوئوں کو دیکھ کر فیصلہ کرنا ہے ،نگران سیٹ اپ اور آئندہ الیکشن کی تاریخ بھی دینی ہے ،ان سب پہلوئوں کو مدنظر رکھ کر فیصلہ کروں گا جو آئینی ،قانونی اور ملک و قوم کے مفاد میں ہوگا۔ گورنر پنجاب محمد بلیغ الرحمان نے صوبائی اسمبلی کی تحلیل سے متعلق سمری پر قانونی ٹیم سے مشاورت کی ۔ذرائع گورنر ہائوس کے مطابق گورنر پنجاب نے اسمبلی تحلیل کرنے کی سمری پر دستخط سے متعلق قانونی، آئینی نکات پر مشاورت کی ۔ ذرائع کا کہنا ہے کہ گورنر پنجاب بلیغ الرحمان نے سمری سے متعلق پارٹی قیادت سے بھی رابطہ کرکے مشاورت کی۔