اسلام آبا د (این این آئی)محکمہ موسمیات نے ملک کے مغربی حصوں میں 20سے 22دسمبر کے دوران گرج چمک کیساتھ بارش ،برفباری کی پیش گوئی کر دی ہے جبکہ سیاحوں اور مسافروں کو محتاط رہنے کی ہدایت کی گئی ہے۔

محکمہ موسمیات کے مطابق 19دسمبر کو مغربی ہوائوں کا ایک سلسلہ بلوچستان میں داخل ہوگا ، 20دسمبر کو مغربی ہوائوں کا سلسلہ بالائی علاقوں کو اپنی لپیٹ میں لے گا ، خیبر پختونخوا کے مختلف علاقوں میں بارش اور بالائی علاقوں میں درمیانے درجے کی برفباری کا امکان ہے ، اسلام آباد،خطہ پوٹھوہار اور میانوالی میں بار ش کا امکان ہونے کے ساتھ مری اور گلیات میں بارش اور برفباری ہو سکتی ہے،پنجاب کے زیادہ تر میدانی علاقوں میں مطلع ابر آلود رہے گا،بوندا باندی بھی ہو سکتی ہے ، 19اور 20دسمبر کے دوران سندھ میں مطلع جزوی ابر آلود رہے گا اور بلوچستان میں 19سے 20دسمبر کے دوران بارش اور برفباری کا امکان ہے ۔