اسلام آباد (مانیٹرنگ ڈیسک) سعودی حکومت نے پاکستان میں مقیم اپنے شہریوں کو محتاط رہنے کی ہدایت دی ہے، اس سلسلے میں مراسلہ بھی جاری کردیا گیا ہے۔تفصیلات کے مطابق پاکستان میں سکیورٹی کی موجودہ صورتحال کے پیش نظر اسلام آباد میں

سعودی عرب کے سفارت خانہ نے الرٹ جاری کردیا۔نجی ٹی وی اے آروائی کے مطابق ملک میں مقیم سعودی شہریوں کیلئے جاری کیے گئے الرٹ نوٹس میں سعودی سفارتخانہ نے ہدایات دی ہیں کہ پاکستان میں رہنے اور آنے والے سعودی شہری احتیاط برتیں۔سفارت خانے نے متنبہ کیا ہے کہ سعودی شہری ضرورت کے علاوہ اپنے گھروں یا ہوٹلوں سے باہر نہ نکلیں کیونکہ اسلام آباد کی سکیورٹی بھی ہائی الرٹ کی گئی ہے۔سعودی سفارت خانہ کی جانب سے جاری مراسلے میں مزید کہا ہے کہ سعودی شہری ضرورت پڑنے پر اپنے سفارت خانے اور قونصلیٹ سے فوری رابطہ کرسکتے ہیں۔واضح رہے کہ وفاقی حکومت نے گزشتہ جمعہ کو اسلام آباد کے علاقے آئی 10 میں ہونے والے خودکش دھماکے کے بعد شہر کی سکیورٹی ہائی الرٹ کردی تھی۔دھماکے میں ایک پولیس اہلکار شہید اور 4 اہلکاروں سمیت 6 افراد زخمی ہوئے تھے، شہید اہلکار عدیل حسنین کو سرکاری اعزاز کے ساتھ سپرد خاک کیا گیا۔