لاہور/کوئٹہ(این این آئی)پنجاب کے میدانی علاقے گہری دھند کی لپیٹ میں ہیں جس کی وجہ سے موٹر ویز کے متعدد سیکشن بند رکھے گئے، شدید دھند کے باعث فضائی آپریشن بھی متاثر ہے۔ ترجمان موٹر وے کے مطابق موٹر وے ایم 3 جڑانوالہ سے درخانہ تک بند رکھی گئی، موٹر وے ایم 4 فیصل آباد سے عبدالحکیم اور موٹر وے ایم 5 شیر شاہ

سے ترنڈہ محمد پناہ تک بند رہی۔موٹر وے ایم1 اسلام آباد ٹول پلازہ 386 کلوتا مین پشاور ٹول پلازہ 498کلو تک شدیدی دھند کے سبب بند رہی۔دھند چھٹنے کے بعد موٹر ویز کو مرحلہ وار کھول دیاگیا۔محکمہ موسمیات نے آئندہ چند روز کے دوران ملک کے میدانی علاقوں میں شدید دھند کا سلسلہ جاری رہنے کی پیشنگوئی کی ہے۔دھند کے باعث لاہور ائیرپورٹ پر پروازیں بھی متاثر رہیں۔باکو، دمام، ابوظہبی اور استنبول سے لاہور آنے والی پروازوں کو اترنے کی اجازت نہ ملی۔باکو، دمام، ابوظہبی اور استنبول سے آنے والی پروازوں کو اسلام آباد اتار لیا گیا۔لاہور سے دن بارہ بجے سے پہلے جانے والی پی آئی اے کی پروازیں لاہور کی بجائے اسلام آباد سے روانہ کی گئیں۔ مسقط، جدہ، دبئی اور ریاض جانے والی پروازیں بھی اسلام آباد منتقل کر دی گئیں۔رپورٹ کے مطابق جدہ جانے والی پرواز پی کے 759، دبئی جانے والی پرواز پی کے 203، ریاض جانے والی پرواز پی کے 725 اور مسقط جانے والی پی کے 229 اسلام آباد سے روانہ کی گئیں۔دوسری جانب سائبیرین ہوائیں چلنے سے شمالی بلوچستان اور سندھ میں سردی کی شدت میں اضافہ ہوگیا۔وادی زیارت میں درجہ حرارت منفی 10 تک پہنچ گیا، بلوچستان کے کان مہترزئی، توبہ اچکزئی، خانوزئی میں درجہ حرارت منفی 9 ڈگری ریکارڈ کیا گیا۔محکمہ موسمیات نے اتوار سے بارش اور برفباری برسانے والے مغربی سسٹم کے شمالی بلوچستان میں داخل ہونے کی پیش گوئی کرتے ہوئے شمالی علاقہ جات اور بلوچستان میں شدید سردی کی وارننگ جاری کر دی ہے۔

موضوعات:محکمہ موسمیات