پیر گدو (این این آئی)وزیراعظم محمد شہباز شریف نے متاثرہ علاقوں سے سیلابی پانی نکالنے کے لئے اقدامات تیز کرنے کی ہدایت کرتے ہوئے کہاہے کہ سردی کی آمد کی وجہ سے متاثرین کی بحالی کے عمل کو مزید تیز کیاجائے،صوبائی حکومتوں اور اداروں کی سیلاب متاثرہ علاقوں میں دن رات کی
کوششیں قابل تعریف ہیں ،یہ ایک قومی خدمت ہے، قومی خدمت کے جذبے کے ساتھ ہی کام کرنا ہوگا۔ بدھ کو وزیراعظم شہبازشریف نے خیرپوراور تعلقہ کوٹ ڈیجی کے سیلاب متاثرہ گاوں پیر گدوکا ایک روزہ دورہ کیا ۔وزیراعظم شہبازشریف کو دوران پرواز چئیرمین این ڈی ایم اے لیفٹیننٹ جنرل انعام حیدر ملک کی بریفنگ دی گئی ۔چیئرمین این ڈی ایم اے نے وزیراعظم کو متاثرہ علاقوں سے سیلابی پانی کے نکاس اور بحالی کی کارروائیوں سے آگاہ کیا ۔وزیراعظم نے متاثرہ علاقوں سے سیلابی پانی نکالنے کے لئے اقدامات تیز کرنے کی ہدایت کی ۔وزیراعظم نے اضافی مشینری، افرادی قوت اور وسائل بروئے کار لانے کی ہدایت کرتے ہوئے کہاکہ سردی کی آمد کی وجہ سے متاثرین کی بحالی کے عمل کو مزید تیز کیاجائے ۔وزیراعظم نے این ڈی ایم اے اور دیگر اداروں کی کارکردگی کی حوصلہ افزائی کی ۔ وزیر اعظم نے کہاکہ صوبائی حکومتوں اور اداروں کی سیلاب متاثرہ علاقوں میں دن رات کی کوششیں قابل تعریف ہیں ۔ وزیر اعظم نے کہاکہ یہ ایک قومی خدمت ہے، قومی خدمت کے جذبے کے ساتھ ہی کام کرنا ہوگا۔
