لاہور ( این این آئی) پنجاب پولیس نے تحریک انصاف کے لانگ مارچ کیلئے سکیورٹی پلان ازسر نو تشکیل دیتے ہوئے 20ہزار سکیورٹی اہلکار تعینات کر دیئے ،دونوں قافلوں کے کنٹینرز کے ارد گرد سکیورٹی کا خصوصی حصار بنایا بنایا گیا ہے جبکہ بلٹ پروف شیشے اور روسٹرم لگا دیئے گئے ،لانگ مارچ انتظامیہ کو سکیورٹی ایس او پیز پر
ہر صورت عملدر آمد کرنے کی درخواست کر دی گئی ۔ترجمان پنجاب پولیس کے مطابق وزیر آباد اور ٹوبہ ٹیک سنگھ سے شروع ہونے والے لانگ مارچ پر مجموعی طور پر 20 ہزار سکیورٹی اہلکار تعینات کیے گئے ہیں ، کنٹینر کے ارد گرد سکیورٹی کا خصوصی حصار بنایا گیا ہے ،سکیورٹی ایس او پیز کے مطابق کسی بھی غیر متعلقہ شخص یا گاڑی کو کنٹینر کے قریب نہیں آنے دیا جائے گا۔جبکہ لانگ مارچ کے دونوں قافلوں کے کنٹینرز پر بلٹ پروف شیشے اور روسٹرم بھی لگائے گئے ہیں ۔لانگ مارچ کے روٹس کی عمارتوں پر کمانڈوز تعینات ہونگے اور سی سی ٹی کیمروں سے بھی مانیٹرنگ ہو رہی ہے ، لانگ مارچ میں آنے والے شرکا کے اسلحہ بردار پرائیویٹ گارڈز کا داخلہ ممنوع، ہوائی فائرنگ پر پابندی ہو گی ، سنٹرل پولیس آفس میں قائم کنٹرول روم سے بھی مانیٹرنگ کا عمل جاری رہے گا۔اسپیشل برانچ، سی ٹی ڈی اور ضلعی پولیس کو لانگ مارچ کے روٹس پر سرچ اینڈ کومبنگ آپریشنز روانہ کی بنیادوں پر کرنے کی ہدایات کی گئی ہے ۔ ترجمان پولیس کے مطابق شہریوں کے لیے ٹریفک کی روانی یقینی بنانے کے لیے متبادل روٹس اور اضافی نفری تعینات کی گئی ہے ۔لانگ مارچ انتظامیہ کو سکیورٹی ایس او پیز پر ہر صورت عملدر آمد کرنے کی درخواست کی گئی ہیں۔
