پشاور(این این آئی)محکمہ موسمیات نے خیبر پختونخواکے مختلف حصوں میں بارش کا سلسلہ پیر تک جاری رہنے کی پیش گوئی کردی، دیر لوئر اور چترال سمیت بالائی علاقوں میں برفباری سے سردی کی شدت میں اضافہ ہوگیا۔محکمہ موسمیات کے مطابق پشاور سمیت پختون خوا میں بارش کا سلسلہ پیر تک جاری رہنے کا امکان ہے،
صوبے کے مختلف حصوں میں کبھی تیز تو کبھی ہلکی بارش کا سلسلہ وقفے وقفے سے جاری رہے گا جب کہ بالائی اضلاع میں برف باری کا سلسلہ بھی شروع ہونے کا امکان ہے۔اسی حوالے سے پی ڈی ایم اے نے بھی تیز بارشوں اور برف باری کے نظر پیشگی اقدامات کی ہدایت کردی ہے اور کہا ہے کہ انتظامیہ رابطہ سڑکیں کھلی رکھنے کے لیے پیشگی انتظامات کرے، بالائی اضلاع میں برف باری سے رابطہ سڑکیں بند ہوسکتی ہیں، ضلعی انتظامیہ چھوٹی بھاری مشینری کی دستیابی یقینی بنائیں۔ دیر لویر دوسرے روز بھی شہری علاقوں میں بارش ہوئی اور بالائی علاقوں پر برف باری وقفے وقفے سے جاری رہی۔ بارش و برف باری سے سردی کی شدت میں اضافہ ہوگیا۔ سردی سے بچنے کیلئے لوگوں نے گرم ملبوسات کا استعمال شروع کردیا۔چترال میں بھی مختلف مقامات بارش اور پہاڑوں پر برف باری ہوئی۔ چترال میں گزشتہ آدھی رات سے وقفے وقفے سے ہلکی بارش اور پہاڑوں پر برف باری جاری ہے۔ جہاں بارش رک گئی ہے وہاں گہرے بادلوں نے آسمان کو لپیٹ میں لے رکھا ہے۔بارش، برفباری اور کالے بادلوں کی وجہ سے چترال میں سردی میں غیر معمولی اضافہ ہوگیا ہے۔ گھروں اور عبادت گاہوں کو گرم رکھنے کیلئے آگ جلانے کا اضافی عمل شروع ہوگیا ہے۔ دو دن سے مسلسل بارشوں سے گندم کی کاشت بھی متاثر ہوئی ہے۔
