لاہور ( این این آئی) این اے 108فیصل آباد سے مسلم لیگ (ن) کے امیدوار عابد شیر علی نے شکست تسلیم کرلی۔انہوں نے شکست کو عوام کا فیصلہ قرار دے دیا اور کہا کہ ہار کا سبب مہنگائی اور بجلی کے بلوں سمیت مختلف ایشوز تھے۔عابد شیر علی کا کہنا تھا کہ یہ ریہرسل تھی، کارکن نئے جذبے سے آئندہ کیلئے تیاری کریں۔
واضح رہے کہ این اے 108 فیصل آباد کے غیرسرکاری غیر حتمی نتیجے کے مطابق عمران خان نے (ن) لیگ کے عابد شیر علی کو 24 ہزار 471 ووٹوں سے ہرا دیا۔
دوسری جانب ترجمان وزیر اعلی پنجاب فیاض الحسن چوہان نے کہا ہے کہ ضمنی انتخاب میں پی ٹی آئی کی جیت اصل میں عمران خان کے بیانیے کی جیت ہے،لانگ مارچ کا انقلاب امپورٹڈ حکومت کو خس و خاشاک کی طرح بہا کر لے جائے گا ۔انہوں نے ضمنی انتخابات میں تحریک انصاف کی شاندار فتح پر اپنے جاری بیان میں کہا کہ پوری پاکستانی قوم کو حکومت سے کوئی غرض نہیں، وہ فی الفور الیکشن چاہتے ہیں، حکمران نوشت دیوار پڑھ لیں اور اپنا قبلہ و کعبہ درست کر لیں ،آواز خلق کو نقارہ خدا سمجھتے ہوئے فوری طور پر انتخابات کا اعلان کیا جائے،پاکستان کے مقتدر حلقے الیکشن کے نتائج دیکھ کر فوری طور پر اپنی پالیسی تبدیل کریں،لانگ مارچ کا انقلاب امپورٹڈ حکومت کو خس و خاشاک کی طرح بہا کر لے جائے گا ۔ فیاض چوہان نے کہا کہ مائنس ون کا خواب دیکھنے والوں کے چہرے پر ضمنی الیکشن کی شکست عوام کی طرف سے زناٹے دار تھپڑ ہے، مرضی کے میدان، کھیلاڑی اور امپائرز کے با وجود امپورٹڈ حکومت کو شکست ہوئی، چوروں لٹیروں، نوسربازوں کی پاکستانی سیاست میں اب کوئی جگہ نہیں۔ عوام نے کرپٹ، نا اہل اور نالائق ٹولے کو گلی محلے کی سیاست تک محدود کر دیا ہے۔
