اسلام آباد(این این آئی)کسان اتحاد کا دھرنا پانچویں روز میں داخل ہوگیا، مظاہرین نے پیر تک حکومت کو ڈیڈی لائن دیدی۔ مظاہرین کے مطابق پیر کو مطالبات نہ مانے گئے تو ریڈ زون کی جانب مارچ ہو گا،خیابان چوک کے گرد پولیس کی بھاری نفری تعینات کی گئی،خیابان چوک سے ریڈ زون کی جانب جانے والے راستے سیل کئے گئے۔چیئرمین کسان اتحاد خالد حسین باٹھ نے وفاقی حکومت کو مطالبات نہ ماننے پر پورا ملک بند کرنے کی دھمکی دے دی، ان کا کہنا تھا کہ امید ہے کل حکومت ہر صورت ہمارے مطالبات پر نوٹیفکیشن جاری کرے گی۔ اگر بدنیتی سے کام لیا گیا تو پورا ملک بند کر دیں گے، میری کال پر ملک بھر سے لاکھوں کسان اسلام آباد کا رخ کریں گے۔