اسلام آباد(آن لائن)اسلام آباد ہائی کورٹ نے امریکہ میں قید ڈاکٹر عافیہ صدیقی کی رہائی سے متعلق پراگریس رپورٹ جمع کرانے کی ہدایت کرتے ہوئے کیس کی سماعت2 ہفتوں کیلئے ملتوی کر دی۔اسلام آباد ہائیکورٹ کے جسٹس سردار اعجاز اسحاق خان نے امریکہ میں قید
ڈاکٹر عافیہ صدیقی کی رہائی کے لیے دائر درخواست پر سماعت کی ۔دفتر خارجہ کے لیگل ایڈوائزر اسد برکی عدالت کے سامنے پیش ہوئے انہوں نے ڈاکٹر عافیہ صدیقی کی رہائی کے لیے امریکہ سے سفارتی محاذ پر از سر نو کوششوں کی تجویز دے دی،دفتر خارجہ کے نمائندہ کا کہنا تھا کہ عافیہ صدیقی کی رہائی کے لیے امریکہ سے از سر نو سفارتی کوشش کی جا سکتیں ہیں، دفتر خارجہ اس معاملے کو سفارتی سطح پر اٹھا سکتا ہے ،امریکی اٹارنی جنرل کو ہمارے اٹارنی جنرل بھی لکھ سکتے ہیں، دفتر خارجہ صرف سفارتی محاذ پر کوشش کر سکتا ہے ،قانونی محاذ کو وزارت داخلہ نے دیکھنا ہے۔ڈاکٹر فوزیہ صدیقی نے عدالت کو بتایا کہ امریکہ کے قیدیوں کی سزا میں معافی کے آفس میں درخواست دی گئی تھی۔ عدالت نے دفتر خارجہ کو پراگریس رپورٹ عدالت میں جمع کرانے کی ہدایت کرتے ہوئے کیس کی مزیدسماعت دو ہفتوں کے لیے ملتوی کردی۔
