اسلام آباد (نیوز ڈیسک) دنیا بھر میں مشہور نابینا پیشگو بابا وانگا کی جانب سے آئندہ برس کے بارے میں کی گئی قدیم پیشگوئیاں ایک بار پھر منظرِ عام پر آ گئی ہیں، جنہیں سوشل میڈیا اور عالمی ذرائع ابلاغ میں خاصی توجہ مل رہی ہے۔
بابا وانگا کون تھیں؟
بلغاریہ سے تعلق رکھنے والی آنجہانی بابا وانگا کو دنیا کی معروف نابینا نجومیوں میں شمار کیا جاتا ہے۔ کہا جاتا ہے کہ انہوں نے کئی بڑے عالمی اور المناک واقعات سے متعلق درست پیشگوئیاں کیں۔ بابا وانگا 1911 میں پیدا ہوئیں اور 1996 میں 85 برس کی عمر میں انتقال کر گئیں، تاہم ان کی وفات سے قبل کی گئی پیشگوئیاں آج بھی زیرِ بحث رہتی ہیں، جن میں نائن الیون سے متعلق مبینہ پیشگوئی بھی شامل ہے۔
ابتدائی زندگی میں وہ رومانیہ میں رہیں، جہاں 12 برس کی عمر میں شدید گرد و غبار کے طوفان کے دوران بینائی سے محروم ہو گئیں۔ بابا وانگا نہ صرف جڑی بوٹیوں سے علاج کرنے والی حکیمہ تھیں بلکہ مذہبی شخصیت کے طور پر بھی جانی جاتی تھیں۔ ان کا دعویٰ تھا کہ انہوں نے دنیا کے مستقبل سے متعلق پیشگوئیاں سال 5079 تک کی ہیں، جس کے بعد دنیا کے خاتمے کا تصور پیش کیا جاتا ہے۔
بابا وانگا کی 2026 سے متعلق پیشگوئیاں
قدرتی آفات میں اضافہ
بابا وانگا کے مطابق 2026 میں دنیا شدید قدرتی آزمائشوں کی لپیٹ میں آ سکتی ہے۔ ان کی پیشگوئی کے مطابق بڑے زلزلے، آتش فشاں پھٹنے اور موسمی شدت کے باعث زمین کا تقریباً 7 سے 8 فیصد حصہ متاثر ہو سکتا ہے۔ حالیہ برسوں میں یورپ کی شدید گرمی، آسٹریلیا اور کینیڈا کی جنگلاتی آگ اور مختلف ممالک میں آنے والے تباہ کن زلزلوں کے تناظر میں اس پیشگوئی کو خاص اہمیت دی جا رہی ہے۔
عالمی تنازعات میں شدت
بابا وانگا نے آنے والے برسوں کو عالمی کشیدگی کا دور بھی قرار دیا تھا۔ ان کے مطابق 2025 سے انسانیت کے زوال کا آغاز ہوگا جبکہ 2026 میں چین، روس اور امریکا جیسی بڑی طاقتوں کے درمیان تنازعات شدت اختیار کر سکتے ہیں۔ بعض رپورٹس میں تائیوان کے معاملے پر چین کی ممکنہ پیش رفت اور روس و امریکا کے درمیان براہِ راست تصادم کے خدشات کا ذکر کیا جاتا ہے۔
غیر زمینی مخلوق سے رابطہ
ایک حیران کن پیشگوئی کے مطابق 2026 میں انسانوں کا کسی دوسری تہذیب یا مخلوق سے پہلا رابطہ ممکن ہو سکتا ہے۔ کچھ قیاس آرائیوں میں زمین کے قریب کسی بڑے خلائی جہاز کی آمد کا ذکر بھی سامنے آتا ہے، جسے بعض لوگ بین النجمی مظاہر سے جوڑ رہے ہیں۔
عالمی معیشت کے لیے کڑا وقت
بابا وانگا کے مطابق آنے والا سال عالمی معاشی نظام کے لیے نہایت مشکل ثابت ہو سکتا ہے، جہاں مالی دباؤ اور عدم استحکام میں اضافہ متوقع ہے۔
مصنوعی ذہانت کا فیصلہ کن مرحلہ
ان کی پیشگوئیوں میں یہ بھی شامل ہے کہ 2026 میں مصنوعی ذہانت ایک اہم موڑ پر پہنچ جائے گی اور دنیا کے کئی بڑے شعبوں پر اس کا غلبہ بڑھ جائے گا۔ اس پیش رفت کے نتیجے میں روزگار کے مواقع متاثر ہونے کے ساتھ ساتھ نئے اور سنگین چیلنجز جنم لے سکتے ہیں۔
ان پیشگوئیوں کو بعض حلقے محض قیاس آرائیاں قرار دیتے ہیں، تاہم بابا وانگا کے نام سے منسوب دعوے آج بھی عالمی سطح پر تجسس اور بحث کا باعث بنے ہوئے ہیں۔
