اسلام آباد (نیوز ڈیسک)حکومتِ پاکستان نے شاعرِ مشرق علامہ محمد اقبال کے 149ویں یومِ پیدائش کے سلسلے میں 9 نومبر کو ملک بھر میں عام تعطیل کا اعلان کردیا ہے۔

اس حوالے سے کابینہ ڈویژن نے باضابطہ نوٹیفکیشن بھی جاری کردیا ہے۔جاری کردہ اعلامیے کے مطابق 19 جنوری 2026 کو منظور کیے گئے سالانہ تعطیلات کے شیڈول کے تحت پیر، 9 نومبر کو سرکاری و نجی تعلیمی اداروں سمیت تمام وفاقی اور صوبائی دفاتر بند رہیں گے۔ اس فیصلے پر عمل درآمد یقینی بنانے کے لیے متعلقہ وزارتوں اور ماتحت اداروں کو بھی ہدایات جاری کردی گئی ہیں۔

تعطیل کے باعث ملک بھر کے اسکولز، کالجز، جامعات اور سرکاری و نجی دفاتر میں معمول کی سرگرمیاں معطل رہیں گی۔اس اعلان سے ہفتے میں دو روز، یعنی ہفتہ اور اتوار کو چھٹی کرنے والے ملازمین کو مسلسل تین تعطیلات میسر آئیں گی۔ یوں 7 نومبر بروز ہفتہ سے شروع ہونے والا لانگ ویک اینڈ 9 نومبر پیر تک جاری رہے گا، جبکہ سرکاری اور کاروباری سرگرمیاں 10 نومبر بروز منگل سے دوبارہ معمول کے مطابق شروع ہوں گی۔