اسلام آباد (نیوز ڈ یسک) لاہور کی طفیل کالونی، بند روڈ پر روٹی کی قیمت کم ادا کرنے کے معاملے پر ہونے والے جھگڑے نے 16 سالہ نوجوان کی جان لے لی۔

واقعے کی سی سی ٹی وی فوٹیج بھی منظر عام پر آگئی ہے، جس میں فائرنگ کا واقعہ دیکھا جاسکتا ہے۔تفصیلات کے مطابق ایک شخص طفیل کالونی میں واقع نان شاپ پر روٹی خریدنے پہنچا، تاہم اس کے پاس مطلوبہ رقم پوری نہیں تھی۔ اسی بات پر دکاندار کے کم عمر ملازم سے تلخ کلامی شروع ہوگئی، جو دیکھتے ہی دیکھتے جھگڑے میں تبدیل ہوگئی۔ اس دوران گاہک نے پستول نکالا اور 16 سالہ لڑکے پر فائرنگ کردی۔نجی ٹی وی چینل 24 نیوز کے مطابق مقتول فیضان کے والد ناصر علی کی مدعیت میں چار افراد کو مقدمے میں نامزد کیا گیا ہے، جن میں حسنین شہباز، عرفان عرف بھولا اور بھولا ولد اشفاق شامل ہیں۔

پولیس حکام کا کہنا ہے کہ واقعے کی سی سی ٹی وی ویڈیو حاصل کرلی گئی ہے، جس میں جھگڑے کے دوران متعدد افراد کو نوجوان پر تشدد کرتے دیکھا جاسکتا ہے۔ فوٹیج میں ایک مسلح شخص پستول نکال کر فیضان پر فائرنگ کرتا بھی نظر آتا ہے، جبکہ واردات کے بعد ملزم اور اس کے ساتھی موقع سے فرار ہوجاتے ہیں۔پولیس کے مطابق مقدمے کا مرکزی ملزم عرفان عرف بھولا گرفتار کرلیا گیا ہے، جبکہ دیگر نامزد ملزمان کی تلاش جاری ہے۔