شارجہ (این این آئی)پاکستان کرکٹ ٹیم کے کپتان بابر اعظم کے والد اعظم صدیقی نے کہا ہے کہ ان کے لیے ٹیم کے سارے کھلاڑی بیٹے بابر جیسے ہیں۔سوشل میڈیا پر اعظم صدیقی کا افغانستان کے خلاف فتح کے بعد میڈیا سے گفتگو کا ایک کلپ وائرل ہو گیا جس میں انھوں نے ٹیم کے کھلاڑیوں سمیت وکٹ کیپر بیٹسمین محمد رضوان کے
ٹی ٹوئنٹی رینکنگ میں بابر اعظم کی جگہ پر لینے پر بات کی۔افغانستان کے خلاف جیت پر خوشی کا اظہار کرتے ہوئے اعظم صدیقی نے کہاکہ میں نے یہ بات پہلے بھی واضح کی تھی کہ پاکستان کے 11 کے 11 کھلاڑی بابر ہیں، اللہ کے فضل سے ورلڈکپ تک جیت کا یہ سلسلہ دراز رہے گا۔بابر کی ایشیا کپ میں پرفارمنس کے سوال پر اعظم صدیقی نے کہا کہ کوئی بات نہیں، بابر میں جو بھی کمی ہے اللہ اس کو پورا کر دے گا، بابر کی محنت پوری ہے تاہم اگر اللہ کی طرف سے دیر ہے تو کوئی بات نہیں۔صحافی نے کپتان کے والد سے اگلا سوال کیا آپ کی کیا خواہش ہے کہ بابر اعظم ایشیا کپ اٹھائے؟ جس پر اعظم صدیقی نے فوراًصحافی کو ٹوکتے ہوئے کہا کہ غلط بات نہ کریں بابر اعظم نہیں بلکہ یہ کہیں کہ پاکستان ایشیا کپ اٹھائے، بابر اعظم پاکستان ہے، اسی طرح آخر تک ساریکھلاڑی ماریں گے کیوں کہ سب بابر ہیں۔رضوان کے ٹی ٹوئنٹی رینکنگ میں بابر کی جگہ لینے کے سوال پر اعظم صدیقی نے کہا کہ میرے لیے رضوان بھی بابر ہے کیوں کہ سب پاکستان کے لیے کھیل رہے ہیں۔یاد رہے کہ بابر اعظم سے ٹی ٹوئنٹی رینکنگ کی پہلی پوزیشن چھن گئی ہے، پلیئرز رینکنگ کے مطابق قومی وکٹ کیپر بیٹر محمد رضوان نمبر ون ٹی ٹوئنٹی بیٹر بن گئے ۔
