نئی دہلی،لاہور(این این آئی) بھارت میں حکمراں جماعت بی جے پی کے رہنمائوں کے گستاخانہ بیانات کیخلاف احتجاج کرنے والوں پرپولیس کی براہ راست فائرنگ سے دوافراد جاں بحق ہوگئے۔بھارتی میڈیا کے مطابق ریاست جھاڑکھنڈ کے شہررانچی میں نبی کریم ۖ کی
شان میں بی جے پی رہنماں کے گستاخانہ بیانات کے خلاف احتجاج کرنے والے مسلمان مظاہرین پرپولیس ٹوٹ پڑی۔ پولیس کی براہ راست فائرنگ اور بدترین تشدد سے 2 مظاہرین جاں بحق اوردرجنوں زخمی ہوگئے۔مودی سرکار کی ہندو انتہاپسند پولیس نے جانبدارانہ سلو ک کرتے ہوئے متعدد پرامن اورنہتے مظاہرین کو گرفتارکرلیا۔ بھارت کے دیگرشہروں میں بھی بی جے پی رہنماں کی ہرزہ سرائی کے خلاف مظاہرے جاری ہیں۔دوسری جانب وزیراعظم شہباز شریف نے سپیکر قومی اسمبلی راجہ پرویز اشرف سے کل ( پیر) کے روز قومی اسمبلی میں ناموس رسالتۖکے معاملے پر بحث کرانے کی درخواست کردی ۔وزیر اعظم شہباز شریف نے کہا کہ بی جے پی کے لیڈروں کی ہرزہ سرائی کی شدید مذمت کرتے ہیں ،دنیا کے سوا ارب مسلمانوں کے دل کا خون کیاگیا ہے جس پر تمام مسلمان سراپا احتجاج ہیں ۔ شہباز شریف نے کہا کہ آقا کریمۖ سے ہماری عقیدت و محبت کے اس اہم اور نازک معاملے پر ایوان میں بحث کرائی جائے ،بھارت میں ہونے والے اس قابل مذمت واقعے کے خلاف ایوان قرارداد منظور کرے ،قرارداد کے ذریعے بھارت سمیت پوری دنیا کو بتا دینا چاہتے ہیں کہ آقا کریم ۖکی حرمت کے لئے ہم ہر قربانی دینے کو تیار ہیں۔
