لاہور( این این آئی) محکمہ اینٹی کرپشن نے رشوت ستانی میں ملوث سرکاری ملازمین سمیت 3 افراد کوگرفتار جبکہ سرکاری منصوبے میں ناقص تعمیر کے ذمہ داروں سے10لاکھ روپے کی ریکوری بھی کر لی گئی ۔

شیخوپورہ، ڈی جی خان اور راجن پور میں محکمہ مال اور محکمہ انہار کے ملازمین کے خلاف کارروائیاں کی گئیں۔ ترجمان کے مطابق شیخوپورہ سے جعلی کورٹ آرڈر تیار کرنے پر ملزم احتشام اللہ کوگرفتارکیا گیا ،احتشام اللہ نے سول کورٹ فیروزوالا کے تعمیل کنندہ رضوان صابر کی ملی بھگت سے جعلی کورٹ آرڈر تیار کئے۔ملزمان نے عدالت کے جعلی وارنٹ داخل کے ذریعے احمد نگر میں واقع زمین کا غیر قانونی قبضہ حاصل کرنے کی کوشش کی۔ محکمہ اینٹی کرپشن کی ٹیم نے محکمہ انہار کے رشوت خور سب ڈویژنل ریڈر سجاد حسین اور پٹواری عبدالعزیز کو رنگے ہاتھوں گرفتار کر لیا گیا۔ ملزمان نے اضافی نہری پانی فراہم کرنے اور تھانہ دجل سے ایف آئی آر ختم کروانے کیلئے رشوت وصول کی۔ ملزمان کے خلاف تھانہ اینٹی کرپشن راجن پور میں مقدمہ درج کر کے رشوت کے 15 ہزار روپے بھی بر آمد کر لیے گئے۔اراضی ریکارڈ سینٹر تونسہ کی تعمیر میں ناقص میٹریل کے استعمال پر بلڈنگ ڈپارٹمنٹ کے ملازمین کو جرمانہ کر دیا گیا ۔اینٹی کرپشن پنجاب نے ناقص تعمیر کے ذمہ دار ملازمین سے مجموعی طور پر 10 لاکھ 77 ہزار روپے وصول کرکے سرکاری خزانے میں جمع کروا دیئے۔