اسلام آباد (این این آئی)پاکستان پیپلز پارٹی کے چیئرمین بلاول بھٹو زرداری نے فواد چوہدری کے مقابلے میں ندیم افضل چن کو فوقیت دے دی۔پریس کانفرنس کرتے ہوئے چیئرمین پیپلز پارٹی بلاول بھٹو زرداری نے کہا کہ ندیم افضل چَن سارے پاکستان میں ایک، فواد ہر بازار میں دستیاب ہے۔

بلاول بھٹو زرداری نے نام لیے بغیر فواد چوہدری پر طنز کردیا۔صحافی نے پوچھا تھا کیا ندیم افضل چَن کی طرح فواد چوہدری کو واپس لے لیں گے جس کے جواب میں بلاول بھٹو نے کہاکہ پورے پاکستان میں ایک ہی ندیم افضل چَن ہے، جو دوسرا نام لیا وہ تو ہر بازار میں ملتا ہے۔بلاول بھٹو زر داری نے کہاکہ کہ آصفہ بی بی پر حملے کا واقعہ ہمارے لیے قابل برداشت نہیں، وزیراعظم قوم کے سامنے کھڑا ہوکے صدر زرداری کو بندوق کی دھمکی دیتا ہے، آصف زرداری کو دھمکی بھی برداشت سے باہر ہے۔پی پی چیئرمین نے کہا کہ جو سمجھتے ہیں ہم ڈر جائیں گے وہ جان لیں ہمارے اندر شہیدوں کا خون ہے، پیپلز پارٹی ہر دور میں ہر ظالم سے ٹکرائی ہے، ہم نے کبھی بندوق استعمال نہیں کی مگر ہم بندوق استعمال کرنا جانتے ہیں، میں پرامن آدمی ہوں، پرامن رہوں گا۔بلاول بھٹو نے کہاکہ تنا دبائو آئے گا وزیراعظم زیادہ گالیاں دیں گے، گالیاں دینے سے ان کی کرسی نہیں بچے گی، کرسی خطرے میں دیکھ کر وزیراعظم مزید گالیاں دیں گے۔پی پی چیئرمین نے کہا کہ پاکستان کے عوام نے اپنا فیصلہ سنا دیا، اب جھوٹ نہیں چلے گا، سلیکٹڈ کے خلاف پیپلز پارٹی نے پہلے دن سے مقابلہ کیا، آپ ہمیں زندگی اور موت کی دھمکی دیں گے، یہ مذاق نہیں۔