لاہور(مانیٹرنگ ڈیسک ٗ این این آئی)پاکستان پیپلز پارٹی کے چیئرمین بلاول بھٹو زرداری نے ندیم افضل چن کی صورت میں تحریک انصاف کی بڑی وکٹ گرانے کے بعد سابق وزیر اعلیٰ پنجاب منظور وٹو کو بھی پارٹی میں واپسی کی دعوت دے دی۔نجی ٹی وی سماء نے ذرائع کے حوالے سے دعویٰ کیا ہے کہ پی پی پی قیادت نے منظور وٹو خاندان سے رابطہ کرکے انہیں پیپلز پارٹی میں شمولیت کی دعوت دی ہے۔
اس دعوت پر منظور وٹو نے مشاورت کیلئے وقت مانگ لیا اور کہا کہ وہ ساتھیوں سے مشورے کے بعد حتمی جواب دیں گے۔ اس موقع پر منظور وٹو نے کہا کہ بلاول کا حکومت کے خلاف لانگ مارچ ختم ہونے کے بعد پی پی پی قیادت سے ان کی ملاقات ہوسکتی ہے، ان کا پیپلز پارٹی قیادت سے دیرینہ تعلق ہے۔یاد رہے کہ پاکستان تحریک انصاف کو خیر باد کہنے کے بعد ندیم افضل چن نے باضابط طو رپر دوبار پاکستان پیپلز پارٹی میں شمولیت اختیا رکر لی ،ندیم افضل چن نے پاکستان پیپلز پارٹی کے چیئرمین بلاول بھٹو زرداری سے اپنی رہائشگاہ پر ملاقات کے موقع پر شمولیت کا اعلان کیا ۔ اس موقع پر پیپلز پارٹی وسطی پنجاب کے صدر راجہ پرویز اشرف ،وزیر اعلیٰ سندھ سید مراد علی شاہ، قمر زمان کائرہ، اعتزاز احسن ،خورشید شاہ، شازیہ مری ، فیصل کریم کنڈی ،حسن مرتضی، شہزاد سعید چیمہ، ، نثار کھوڑو، رانا فاروق احمد خان، چوہدری نوید، ٹوچی خان، شمیم آفریدی اور دیگر بھی موجود تھے۔ بلاول بھٹو نے ندیم افضل چن کو دوبارہ شمولیت پر خوش آمدید کہتے ہوئے کہا کہ آپ کی واپسی سے پارٹی کو تقویت ملے گی ۔ ہم سب نے مل کر عوام کے حقوق کیلئے جدوجہد کرنی ہے ۔ ندیم افضل چن کی جانب سے پارٹی چیئرمین بلاول بھٹو زرداری اور رہنمائوں کے اعزازمیں ظہرانہ بھی دیا گیا ۔ بلاول بھٹوزرداری کی جوہر ٹائون میں ندیم افضل چن کی رہائشگاہ آمد کے موقع پر کارکنوں کی کثیر تعداد بھی موجود تھی جو قیادت کے حق میں نعرے لگاتے رہے ۔
