لاہور(ا ین این آئی) لاہورہائیکورٹ نے دوسری شادی کرنے پر بہنوئی کے خلاف سالے کی طرف سے درج کرایا گیا مقدمہ خارج کردیا۔لاہور ہائیکورٹ نے محمد غضنفر نوید
کی درخواست پر فیصلہ جاری کیا۔غضنفرکے خلاف سابقہ بیوی جہاں آرا کے بھائی خلیل اکبر نے مقدمہ درج کرایا تھا۔عدالت نے اپنے فیصلے میں کہا کہ متاثرہ فریق بیوی ہے بیوی کابھائی نہیں،اس لیے وہ کیس دائرنہیں کرسکتا لہذا بیوی چاہے تو شوہرکی دوسری شادی کے خلاف عدالت جاسکتی ہے۔برادر نسبتی خلیل اکبر نے اپنی درخواست میں موقف اپنایا تھاکہ دوسری شادی کیلئے غضنفر نے پہلی بیوی کا اجازت نامہ بنوایا جو جعلی ہے۔غضنفر کے خلاف پہلا مقدمہ 2011 میں پہلی بیوی کی اجازت کے بغیر دوسری شادی پر درج کرایا گیا جسے مجسٹریٹ نے خارج کردیا جس کے بعد اس کے برادر نسبتی خلیل نے دوسرا مقدمہ جعلی اجازت نامہ بنانے کے الزام میں 2013 میں درج کرایا تھا۔
