اسلام آباد (این این آئی)پاکستان کرکٹ ٹیم کے سابق کپتان اور اسٹار آل راؤنڈر شاہد خان آفریدی نے کہا ہے کہ حسن علی سے کیچ چھوٹ گیا تو اس کا یہ مطلب یہ نہیں کہ آپ بالکل ہمت ہار جائیں۔اپنے بیان میں بوم بوم آفریدی نے کہا کہ اگر حسن علی سے کیچ چھوٹ گیا

تو اس کا یہ مطلب یہ نہیں کہ آپ بالکل ہمت ہار جائیں اور تین گیندوں پر تین چھکے کھا جائیں۔خیال رہے کہ گزشتہ روز دبئی میں ہونے والے ورلڈ ٹی ٹوئنٹی کے سیمی فائنل میں آسٹریلیا کو جیت کیلئے 20 رنز درکار تھے، شاہین آفریدی نے بولنگ کی تو ویڈ نے اونچا شاٹ کھیلا اور گیند باؤنڈری پر موجود حسن علی کے پاس گئی لیکن انہوں نے کیچ چھوڑ دیا اور دو رنز آسٹریلیا کو ملے۔اگلی تین گیندوں پر میتھیو ویڈ نے تین چھکے لگاکر میچ ختم کردیا اور پاکستان ورلڈ کپ سے باہر ہوگیا۔میچ کے بعد گفتگو کرتے ہوئے بابر اعظم نے بھی کہا کہ میتھیو ویڈ کا کیچ ڈراپ ہونا میچ کا ٹرننگ پوائنٹ تھا، کیچ ہوجاتا تو نیا بیٹسمین آتا اور صورتحال مختلف ہوسکتی تھی، آسٹریلیا جیسی ٹیم کو چانس دیں گے تو وہ میچ جیت ہی جائیں گے۔