لاہور (آن لائن) سابق کپتان شاہد آفریدی نے ٹی ٹونٹی ورلڈ کپ میں پاکستان کی یکے بعد دیگرے دو فتوحات پر خوشی کا اظہار کرتے ہوئے کہا کہ نیوزی لینڈ کیخلاف پاکستان کی شاندار کامیابی پران کا دل ’گارڈن گارڈن‘ ہوگیا ہے۔ ایک انٹرویو میں قومی کرکٹ ٹیم کے 44 سالہ سابق

کپتان شاہد آفریدی نے کہا ہے کہ بھارت کے خلاف جیت پر بہت اچھا لگا، نیوزی لینڈ کے خلاف ٹیم اور زیادہ مثبت ہوکر کھیلی ہے۔شاہد آفریدی نے ٹیم کو مشورہ دیتے ہوئے کہا ہے کہ افغانستان کے خلاف بھی اچھی کرکٹ کھیلنا پڑے گی۔ سابق آل راؤنڈر نے پاکستانی بولنگ لائن اپ پر گفتگو کرتے ہوئے کہا کہ تمام بولرز کو جیت کا کریڈٹ جاتا ہے، شاہین آفریدی اور حارث رؤف بہترین بولنگ کررہے ہیں، وکٹیں اْڑانے والے بولرز چاہیں تو میچ کی بازی پلٹ دیں۔اس کے علاوہ پاک بھارت میچز پر شاہدآفریدی کا کہنا تھا کہ پاکستان اور بھارت ایک بار پھر ٹی ٹونٹی ورلڈ کپ کے فائنل میں ہوں تو لوگ زیادہ انجوائے کریں گے، دونوں ملکوں کے شائقین اپنے اپنے ملکوں میں کرکٹ انجوائے کررہے ہیں البتہ آج کل ہم زیادہ انجوائے کررہے ہیں۔واضح رہے کہ آئی سی سی مینز ٹی ٹونٹی ورلڈکپ کے سپر 12 مرحلے کے پہلے میچ میں پاکستان نے بھارت کو یکطرفہ مقابلے کے بعد 10 وکٹوں سے شکست دے دی جب کہ دوسرے مقابلے میں کیویز کو 5 وکٹوں سے ہرایا۔ پاکستان اپنا تیسرا میچ آج شام 7 بجے افغانستان کے خلاف کھیلے گا۔