سرینگر(این این آئی)غیر قانونی طور پر بھارت کے زیر قبضہ جموں و کشمیر میں انجمن اوقاف جامع مسجد سرینگر نے کہا ہے کہ عید میلاد النبی ﷺ کے سلسلے
میں جامع مسجد سرینگر کو آج نماز جمعہ کے لیے کھولنے کا فیصلہ کیاگیاہے اور اس دوران کورونا ایس او پیز پر بھی سختی سے عملدرآمد کیا جائے گا۔ کشمیر میڈیا سروس کے مطابق انجمن اوقاف نے سرینگر میں جاری ایک بیان میں کہاکہ جب درگاہ حضرت بل سمیت تمام مساجد ، درگاہیں اور امام بارگاہیںمقدس ماہ ربیع الاول کے پیش نظر نماز وںکی ادائیگی کے لیے کھول دی گئی ہیں اور کورونا کیسز میں بھی نمایاںکمی آئی ہے تو قابض حکام کے پاس مقبوضہ جموںوکشمیر کی سب سے بڑی عبادت گاہ جامع مسجد سرینگر کو بند رکھنے کا کوئی جواز نہیں ہے ۔ انجمن نے کہا کہ ہمیں امیدہے کہ قابض حکام اس بات کو یقینی بنائیں گے کہ انجمن اوقاف کے سربراہ میر واعظ عمر فاروق کی نظربندی کو بھی ختم کیاجائے گا جو گزشتہ 28 ماہ سے غیر قانونی طورپر اپنے گھر میں نظربند ہیں تاکہ وہ صدیوں سے جاری تبلیغ کااپنا فریضہ دوبارہ شروع کرسکیں ۔
