لاہور ( آن لائن، این این آئی )لاہور میں کنٹونمنٹ بورڈ الیکشن کے دوران لاہور کی مدینہ کالونی چونگی امر سدھو کے ایک پولنگ سٹیشن پر ایک امیدوار نے اپنے ووٹروں کے لیے دوپہر کے کھانے کا اہتمام کیا ۔امیدوار کا دعویٰ ہے کہ اس نے ووٹروں کے لیے کھانے میں 600 کلو
چکن قورمہ اور 5 ہزار نان روٹی کا اہتمام کیا ہے۔ لاہور میں دیگر کئی امیدواروں کی جانب سے بھی پولنگ ایجنٹس اور ووٹرز کے لیے لنچ کا اہتمام کیا گیا ہے۔امیدواروں کی جانب سے پولنگ ایجنٹس اور ووٹرز کے دوپہر کے کھانے کے لیے بریانی، قورمہ اور قیمے والے نان تیارکرائے گئے ہیں، دوسری جانبکنٹونمنٹ بورڈز کے بلدیاتی انتخابات میں وارڈ نمبر 7سے امیدوار صداقت محمود بٹ انتقال کر گئے جس کی وجہ سے مذکورہ وارڈ کی جنرل نشست پر تمام کارروائی منسوخ کردی گئی ۔بتایا گیاہے کہ والٹن کنٹونمنٹ بورڈ کی وارڈ نمبر7کی جنرل نشست پر حصہ لینے والے پی ٹی آئی ( نظریاتی )کے امیدوارصداقت محمودبٹ جن کا انتخابی نشان بیٹسمین تھا پولنگ کے روز انتقال کر گئے ۔ ریٹرننگ آفیسر محمد بلال رشید نے امیدوارکے انتقال کے باعث مذکورہ وارڈ کی جنرل نشست کے انتخابات کے سلسلہ میں کی گئی تمام کارروائی کومنسوخ کر دیا ۔علاوہ ازیں الیکشن کمیشن نے والٹن کنٹونمنٹ بورڈ کی وارڈ 7میں وفات پانے والے امیدوار کا غلط نوٹیفکیشن جار ی کر دیا۔وفات پانے والے امیدوار کا نام صداقت محمود بٹ ہے جبکہ الیکشن کمیشن نے شوکت محمود بٹ کے نام سے نوٹیفکیشن جاری کیا ،شوکت محمود بٹ وفات پانے والے امیدوار کے والد کا نام ہے۔
