کراچی (این این آئی)پاکستان کے لیجنڈری اداکار و کامیڈین عمر شریف کی اہلیہ زرین عمر نے کہا ہے کہ عْمر شریف کے لیے ایک ایک منٹ قیمتی ہے۔ زرین عْمر شریف نے میڈیا سے گفتگو میں کہا کہ عمر شریف کو امریکا میں علاج کے لیے بذریعہ طیارہ ہی لے جایا جاسکتا ہے۔وزیراعظم آفس سے کہا گیا کہ ویزے کے لیے کوشش کی جارہی ہے، امید ہے ویزا جلد جاری ہو جائے گا۔زرین عْمر شریف نے کہا کہ
پچھلے ماہ عمر شریف کو دل کا دورہ پڑا تھا، ایک ہفتے پہلے عمر شریف کو ہسپتال منتقل کیا گیا۔اْنہوں نے کہا کہ اگر عمر شریف کو امریکا منتقل نہیں کیا گیا تو ان کی یہاں اوپن ہارٹ سرجری کرنا پڑے گی۔زرین عْمر شریف نے کہا کہ عمر شریف کیلئے اوپن ہارٹ سرجری نقصان دہ ثابت ہوسکتی ہے، اْمید ہے کہ ویزا جلد جاری ہوجائے گا۔انہوں نے کہا کہ عمر شریف کو دعاؤں کی اشد ضرورت ہے۔پاکستان کے نامورکامیڈین، اسٹیج اداکار و میزبان عمر شریف کے اہل خانہ نے واضح کیا ہے کہ انہوں نے اداکار کے علاج کے لیے حکومت یا کسی اور سے مالی مدد نہیں مانگی۔عمر شریف کے آفیشل فیس بک اکائونٹ پر کی جانے والی مختصر وضاحتی پوسٹ میں ادکار کی اہلیہ زرین غزل اور بیٹے جواد عمر کے نام سے منسوب پیغام میں بتایا گیا کہ انہوں نے حکومت سے صرف ویزا سہولیات سے متعلق مدد مانگی ہے۔پوسٹ میں لکھا گیا کہ عمر شریف یا ان کے اہل خانہ نے حکومت یا کسی اور ادارے سے مالی مدد نہیں مانگی بلکہ جلد سے جلد علاج کے لیے بیرون ملک منتقل ہونے سے متعلق ویزا سہولیات کی مدد طلب کی تھی۔پوسٹ میں نجی ٹی وی پروگرام کے میزبان وسیم بادامی،وزیراعظم کے معاون خصوصی برائے سیاسی امور شہباز گِل،شاہد آفریدی اور امریکا کے ماہر امراض قلب ڈاکٹر طارق شہاب اور سفیر بٹ کا بھی شکریہ ادا کیا گیا۔مختصر پوسٹ میں بتایا گیاہے کہ حکومتی نمائندے اور دیگر لوگ عمر شریف کے اہل خانہ سے رابطے میں ہیں اور انہوں نے اداکار کی علاج کے لیے بیرون ملک جلد سے جلد منتقلی کے حوالے سے تمام اقدامات اٹھانے کی یقین دہانی کرائی ہے۔
