ملتان(این این آئی) سابق وزیراعظم اور سینیٹ کے اپوزیشن لیڈر یوسف رضا گیلانی نے طالبان سے مشروط مذاکرات کرنے کا مشورہ دیتے ہوئے کہا ہے کہ افغانستان سے متعلق ہمیں جلد بازی میں کوئی فیصلہ نہیں کرنا چاہیے، پرامن افغانستان پاکستان کے لیے ضروری ہے،
اسمبلیوں میں سے استعفے نہیں دینا چاہتے تھے ، پی ڈی ایم سے راہیں جدا کر لیں ،پاکستان پیپلزپارٹی کی اہمیت میں اضافہ ہورہا ہے، ہم کسی چور دروازیسے اقتدارمیں نہیں آنا چاہتے ۔اتوار کو میڈیا سے گفتگو کرتے ہوئے انہوںنے کہاکہ افغانستان سے متعلق ہمیں جلد بازی میں کوئی فیصلہ نہیں کرنا چاہیے، پْرامن افغانستان پاکستان کے لیے ضروری ہے۔انہوںنے کہاکہ طالبان مثبت انداز میں بات کریں تو ہمیں اْن سے مذاکرات کرنا چاہیں۔پاکستان ڈیموکریٹک موومنٹ کے حوالے سے گفتگو کرتے ہوئے یوسف رضا گیلانی نے کہا کہ پی ڈی ایم کا مقصد ایک تضاد تھا کہ اسمبلیوں سے استعفے دیں ، ہم کہتے تھے پارلیمنٹ میں اور باہربھی عوام کے حقوق کی بات کریں۔انہوںنے کہاکہ پارٹی کی سی ای سی کمیٹی نے اسمبلیوں سے استعفے نہ دینے کا فیصلہ کیا، جس پر ہم نے واضح اعلان کر کے پی ڈی ایم سے راہیں جدا کرلیں۔یوسف رضا گیلانی نے کہاکہ ہمارامنشور ہے کہ خواتین ،اقلیتیں، انسانی حقوق کا تحفظ ہوناچاہیے۔ انہوں نے کہا کہ خطے کی بدلتی صورت حال کے ساتھ پاکستان پیپلزپارٹی کی اہمیت میں اضافہ ہورہا ہے، ہم کسی چور دروازیسے اقتدارمیں نہیں آنا چاہتے کیونکہ پی پی عوام کی طاقت پر یقین رکھتی ہے۔
