اسلام آباد(مانیٹرنگ ڈیسک، آن لائن)پاکستان تحریک انصاف کی حکومت کی تین سالہ کارکردگی رپورٹ پیش کرنے کا معاملہ ،وزیراعظم عمران خان آج اسلام آباد میں منعقدہ خصوصی تقریب میں اپنی حکومت کی تین سالہ کارکردگی قوم کے سامنے رکھیں گے، پاکستان تحریک انصاف کا عوام کو اپنی حکومت کی تین سالہ کارکردگی سے آگاہ کرنے کیلئے ملک بھر
میں عوامی مقامات پر وزیراعظم کا خطاب براہِ راست دکھانے کا فیصلہ کیا گیا ہے ،ملک بھر میں وزیراعظم کے تاریخی خطاب کی براہ راست نشریات کے انتظامات کیلئے ٹیمیں تشکیل دے دی گئیں، انصاف یوتھ ونگ کے نوجوان کارکنان پر مشتمل ٹیمیں ملک بھر میں بڑی سکرینیوں پر وزیراعظم کا خطاب عوام کو دکھانے کے انتظامات کریں گی، وزیراعظم کے خطاب کی براہِ راست نشریات کیلئے لاہور، کراچی، پشاور اور کوئٹہ میں بڑی سکرینیں نصب کی جائیں گی ، گلگت، ملتان اور حیدرآباد میں بھی بڑی سکرینوں پر وزیراعظم کا تاریخی خطاب دکھایا جائے گا، پاکستان تحریک انصاف کے ریجنل و مقامی قائدین، کارکنان اور عوام کے ہمراہ ان شہروں میں طے شدہ مقامات پر وزیراعظم کا براہِ راست خطاب سنیں گے ، دوسری جانب وفاقی وزیر فواد چوہدری نے کہا کہ عمران خان کی حکومت 3 سال کی کارکردگی عوام کے سامنے فخرسے رکھ سکتی ہے۔ اپنے ایک بیان میں وفاقی وزیربرائے اطلاعات و نشریات فواد چوہدری کا کہنا تھا کہ پاکستان میں کتنی حکومتیں اپنی کارکردگی پرعوام کو جوابدہی کرتی رہیں، یہ عمران خان کی حکومت ہے جو تین سال کی کارکردگی عوام کے سامنے فخر سے رکھ سکتی ہے۔فواد چوہدری نے کہا کہ 30 سال حکومت کرنے والے اپنا منہ چھپا رہے ہیں۔ معیشت، خارجہ پالیسی اور اندرونی استحکام کے تین سال آج حقائق کے ساتھ سامنے لائیں گے۔
