اسلام آباد (آن لائن) تحریک انصاف حکومت کے تین سالوں کے دوران مہنگائی نے عوام کا جینا دوبھر کر دیا ہے ،عالمی سطح پر بھرپور پذیرائی حاصل کرنے والے وزیر اعظم عمران خان اور ا نکی ٹیم ملکی سطح پر مہنگائی کو کنٹرول کرنے اور ذخیرہ اندوز مافیا کا قلع قمع کرنے میں مکمل طور پر ناکام رہے ہیں۔تحریک انصاف کے دور حکومت کے تین سالوں میں اشیائے خورونوش کی
قیمتیں عام افراد کی پہنچ سے باہر ہو گئیں ہیں چینی 55 روپے سے 105 روپے فی کلو تک پہنچ گئی جبکہ آٹے کا 20 کلو کا تھیلا 362 روپے مہنگا ہوا ہے ادارہ شماریات کے مطابق اگست 2018 میں چینی کی اوسط قیمت 55 روپے 59 پیسے فی کلو تھی جو اگست 2021ئ میں 105 روپے 51 پیسے ہو چکی ہے اسی طرح گھی اور خوردنی تیل کی قیمتوں میں بھی بے تحاشہ اضافہ کیا گیا ہے گذشتہ تین سالوں میں دال ماش 95 روپے 60 پیسے، دال مسور 43 روپے 94 پیسے، دال مونگ اوسط 68 روپے 86 پیسے جبکہ دال چنا 29 روپے77 پیسے فی کلو مہنگی ہوئی۔تین سال میں بکرے کا گوشت 337 روپے، گائے کا گوشت 169 روپے، دودھ 25 روپے 89 پیسے فی لٹر جبکہ دہی 26 روپے 78 پیسے فی کلو مہنگا ہوا۔دستاویز کے مطابق موجودہ حکومت کے دور میں لہسن 120 روپے 68 پیسے، برائلر مرغی 37 روپے 91 پیسے جبکہ انڈوں کی قیمت میں 58 روپے 37 پیسے فی درجن اضافہ ہوا۔ملک میں گذشتہ دوہفتوں کیدوران لہسن اور ٹماٹر سمیت دیگر سبزیوں کی قیمتوں کو پر لگ گئے، ادارہ شماریات کے مطابق گزشتہ دو ہفتوں کے دوران لہسن 70 روپے اورٹماٹر 30 روپے کلو تک مہنگاہوا ہے گوجرانوالہ میں لہسن 70 روپے فی کلو مہنگا ہو کر 280 روپے فی کلو تک پہنچ گیا ہے۔ اسلام آباد میں گزشتہ دو ہفتوں میں لہسن کی قیمت میں 40 روپے فی کلو کا اضافہ ہوا اورلہسن کی فی کلو قیمت 320 روپے تک پہنچ گئی۔اولپنڈی میں لہسن کی قیمت 20 روپے اضافے کے ساتھ 280 روپے فی کلو تک ہو گئی۔ لاہور اور فیصل آباد میں لہسن دو ہفتوں میں 20 روپے فی کلو مہنگا ہوا۔ ملتان، بہاولپور اور کراچی میں لہسن 280 روپے، پشاور اور کوئٹہ میں 270 روپے فی کلو ہو گیا ہے۔اسلام آباد سمیت ملک کے بیشتر شہروں میں ٹماٹر دو ہفتوں میں 70 سے 100 روپے فی کلو تک پہنچ گیا ہے اسی طرح دیگر پھلوں اور سبزیوں کی قیمتوں میں بھی اضافہ ہوا ہے۔ وفاقی دارالحکومت کی انتظامیہ کی جانب سے روزانہ کی بنیاد پر سبزیوں پھلوں اور دیگر اشیائے خورد و نوش کی قیمتوں کا تعین کیا جاتا ہے مگر ان قیمتوں پر عمل درآمد نہیں کیا جاتا ہے۔
