اسلام آباد (این این آئی) پاکستان مسلم لیگ کے امیدوار چوہدری اسماعیل گجر نے آزاد کشمیر الیکشن کے نتائج مسترد کردیئے۔چوہدری اسماعیل گجر نے اپنی پریس کانفرنس کے دوران گزشتہ روز ہونے والے الیکشن کے نتائج کو مسترد کرتے ہوئے کہا کہ 70 پولنگ اسٹیشنز تک میری برتری تھی پھر نتائج روکے گئے، دھاندلی نہیں دھاندلا ہوا، کراچی سے پشاور تک سب کو ہرایا گیا۔
چوہدری اسماعیل گجر نے کہا کہ میرا مقبول گجر سے مقابلہ نہیں الیکشن حکومت کے خلاف لڑ رہا تھا، انہوں نے جو حرکت کی اس کا مقبوضہ کشمیر میں غلط پیغام گیا ہے، عمران خان ہوش کے ناخن لیں، ادھر کشمیر کا کیا حشر ہے، ادھریہ کیا کر رہے ہیں، جو بیان میرے ساتھ منسوب کیا گیا میں اس کی بھرپور تردید کرتا ہوں۔انہوں نے کہا کہ اسمبلی میں کہتا رہا ہوں پہلے پاکستانی ہوں پھر کشمیری ہوں، وہ بیان غلط تھا، میڈیا نے بھی اسے بڑا اچھالا، اگر ایسی بات ہو بھی جائے تو میڈیا کو نہیں اچھالنی چاہیے۔چوہدری اسماعیل گجر نے کہا کہ شوکاز نوٹس ابھی تک مجھے نہیں ملا، اگر ملا تو اس کا جواب دوں گا، گزشتہ روز بھی اپنے بیان کی تردید کی، آج بھی کرتا ہوں، معذرت بھی کرتا ہوں۔انہوں نے کہا کہ دوبارہ گنتی کی درخواست دی ہے، امید ہے اس میں میں جیت جاؤں گا۔ دوسری جانب چیف الیکشن کمشنر آزاد کشمیر عبد الرشید سلہریا نے آزاد کشمیر میں ہونے والے انتخابات میں سے 44کے رزلٹ کا اعلان کرتے ہوئے کہا ہے کہ تحریک انصاف نے25، پیپلز پارٹی 11اور مسلم لیگ (ن)نے چھ نشستیں حاصل کیں،آزادجموں و کشمیر کے ایک حلقے ایل اے 16 کے 4 پولنگ اسٹیشنوں پر دوبارہ پولنگ ہو گی،کسی بھی حلقے کے رزلٹ نہیں روکے گئے،آزادجموں و کشمیر کے انتخابات میں ٹرن آؤٹ 62 فیصد رہا۔چیف الیکشن کمشنر آزادجموں و کشمیر جسٹس ریٹائرڈ عبدالرشید سلہریا
نے ممبر الیکشن کمیشن فرحت علی میر اور ڈی جی اطلاعات راجہ اظہر اقبال کے ہمراہ پریس کانفرنس کرتے ہوئے کہاکہ 45 حلقوں میں ہونے والے انتخابات میں سے 44 کے رزلٹ آ چکے ہیں،پی ٹی آئی نے 25،پاکستان پیپلزپارٹی نے 11،مسلم لیگ ن نے 6،مسلم کانفرنس اور جموں و کشمیر پیپلزپارٹی نے ایک ایک نشست حاصل کی
ہے،آزادجموں و کشمیر کے ایک حلقے ایل اے 16 کے 4 پولنگ اسٹیشنوں پر دوبارہ پولنگ ہو گی۔ انہوں نے کہاکہ آزادجموں و کشمیر کے انتخابات میں ٹرن آؤٹ 62 فیصد رہا،الیکشن کے انعقاد میں میڈیا بالخصوص محکمہ اطلاعات کا تعاون مثالی رہا،محکمہ اطلاعات کے مثالی تعاون پر اسکے شکر گزار ہیں۔چیف الیکشن کمشنر نے کہاکہ امن و امان برقرار رکھنے اور شفاف الیکشن کے انعقاد میں پاک فوج،سول آرمڈ فورسز،انتظامیہ اور عدلیہ نے
بھرپور کردار ادا کیا،دھاندلی کی ایک بھی تحریری شکایت موصول نہیں ہوئی،کسی بھی حلقے کے رزلٹ نہیں روکے گئے۔ انہوں نے کہاکہ پولنگ کے اختتام پر متعلقہ پریذائیڈنگ آفیسرز نے نتائج کا اعلان کیا،ایل اے 16 باغ 4 پر 29 جولائی سے قبل پولنگ کرانے کی کوشش کریں گے،پریس کانفرنس کے دوران الیکشن ڈیوٹی کے دوران پاک فوج کے چار جوانوں کی شہادت پر ان کے بلندی درجات کیلئے خصوصی دعا کی گئی۔
