برنالہ (این این آئی)پاکستان مسلم لیگ (ن)کی نائب صدر مریم نواز نے کہا ہے کہ اگر جولائی کے مہینے میں دھند نہ چھائی تو آزاد کشمیر میں الیکشن (ن)لیگ جیتے گی،مسلم لیگ (ن)اب وہ پرانی جماعت نہیں رہی، اگرالیکشن چوری کرنے کی کوشش کی تو عمران خان کابہت بڑا نقصان ہوگا، جب کشمیرکامقدمہ ہارکرآئیں گے توکیاکشمیری آپ کا استقبال ہارسے کریں گے؟۔
جمعہ کو آزاد کشمیر کے علاقے برنالہ میں انتخابی جلسے سے خطاب میں مریم نواز نے کہا کہ مسلم لیگ ن اب وہ پرانی جماعت نہیں رہی، اگرالیکشن چوری کرنے کی کوشش کی تو عمران خان کابہت بڑا نقصان ہوگا۔مریم نواز نے کہا کہ اگر جولائی کے مہینے میں دھند نہ چھائی تو الیکشن ن لیگ جیتے گی،مخالفین کے سارے جلسے ملا کر بھی ن لیگ کے ایک جلسے کا مقابلہ نہیں کر سکے۔ انہوں نے کہاکہ پچھلے الیکشن میں 2 سیٹیں لینے والو! یادرکھو الیکشن چوری کیا تو عوام نہیں چھوڑیں گے۔نائب صدر ن لیگ نے کہا کہ نواز شریف پر ظلم کے پہاڑ توڑ دیے،سازش کے ذریعے عوام کی کرسی سے ہٹایا لیکن نواز شریف آج بھی عوام کی عدالت میں جیت گیا ہے، نواز شریف کو ہرانے کیلئے آپ الیکشن چوری کرتے ہیں۔انہوں نے کہاکہ 73سال میں کبھی پیٹرول کی قیمت 118روپے نہیں ہوئی، یوٹیلیٹی اسٹورزپرگھی کی قیمت 170سے بڑھ کر260 روپے ہوگئی ہے، عمران خان کی نالائقی اورکرپشن کی وجہ سے مہنگائی ہوئی ہے۔انہوں نے کہا کہ نواز شریف نے اپنے دور میں لوڈشیڈنگ ختم کردی تھی، کشمیریوں نے وفاقی وزیرکاانڈوں سے استقبال کیا، جب کشمیرکامقدمہ ہارکرآئیں گے توکیاکشمیری آپ کا استقبال ہارسے کریں گے؟۔مریم نواز نے کہا کہ کشمیر کا فیصلہ ایسے شخص کے حق میں نہیں دیا جاسکتا جس کی اپنی پہچان کوئی نہ ہو۔
