اسلام آباد( آن لائن، این این آئی ) ملک بھر میں عیدالاضحیٰ سے قبل ایک بار پھر کورونا کیسز میں اضافہ ہونے لگا 24 گھنٹوں کے دوران کورونا کے 2545 مثبت کیسز رپورٹ ہوئے ہیں۔نیشنل کمانڈ اینڈ آپریشن سینٹر کی جانب سے جاری بیان کے مطابق گزشتہ 24 گھنٹوں کے دوران

ملک میں کورونا کی تشخیص کے لیے 48ہزار 910ٹیسٹ کیے گئے جن میں سے 2545 افراد میں کورونا وائرس کی تصدیق ہوئی۔ملک میں اب تک کورونا کے مصدقہ مثبت کیسز کی تعداد 981,392ہوگئی ہے جن میں سے 916,373مریض شفایاب ہو چکے ہیں۔ گزشتہ روز اس وبا نے مزید 47 افراد کی زندگیوں کو نگل لیا۔ اس طرح ملک میں اب تک اس وبا سے جاں بحق افراد کی مجموعی تعداد 22 ہزار 689ہوگئی ہے۔ جب کہ مثبت کیسز کی شرح 5.2 فیصد ریکارڈ ہوئی ہے ، دوسری جانب وفاقی وزیر منصوبہ بندی اور سربراہ این سی او سی اسد عمر نے کہا ہے کہ کورونا وائرس کی بھارتی قسم پورے خطے میں تباہی کا باعث بن رہی ہے۔جمعرات کو اپنے ٹویٹ میں انہوں نے کہا کہ ہسپتالوں اور آئی سی یوز میں کووڈ۔19مریضوں کی تعداد میں بتدریج اضافہ ہو رہا ہے اورکووڈ ۔19کے تشویشناک مریضوں کی تعداد بڑھ رہی ہے۔انہوں نے کہا کہ کورونا وائرس کی بھارتی قسم خطے میں تباہی کا باعث بن رہی ہے اس لئے تمام لوگ ایس او پیز پر عمل کریں، جلد ویکسین لگوائیں اور اپنی اور دوسروں کی زندگیاں خطرے میں نہ ڈالیں۔